Боворинлуье гъэлхэндчи Ватан

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]

    Гьер сал 23-муьн февраль э вилеет иму гIуьзет сохде оморенуьт гъэлхэндчигьой Ватан. Э гIэдот гуьре иму гIуьзетлуь сохденим ве сер зереним э пушой игидлуье лешгерчигьой вилеет иму, комигьоки гьич гъимиш не сохде, дорет жунгьой ишуре эри гъэлдхэнди Ватан. Гьемчуьн вегирлуь сохденим имбурузине гъэлхэндчигьой Ватан имуре, комигьоки э келе муьгьбет, дуьруьсди ве дананмендиревоз гъуллугъ сохденуьт эри Ватан ве хэлгъ хуьшде. Тербиедореи ватанхогьи жовонгьоре э гьеймогьоине зиндегуни гьисди лап келе герекие везифе, комиреки, гьелбет мие э кор венгенуьт гьемме одомигьой вилеет иму. Гъэлхэнди Ватан ве хэлгъгьой юре гьеммише бири ве гьисди эз сер суьфдеине гъэрхунди э пушой хьуькуьмет ве гъэрд эн гьер гражданин вилеет.
    Измуш эри биреи шолумие овхьолет зиндегуни э гIэзизе хори вилеет иму, эдете э гIуьзетевоз бегьем сохде асант нисдигьо гъуллугъи хуьшдере жовоне лешгерчигьойму. Имбурузине издилот ме э товун еки эз гъэлхэндчигьой Ватан имуни, комики э дуьруьсдиревоз бегьем сохди гъэрхунди хуьшдере чуьн холисе ватанхогь ве гражданин Ватан хуьшде.
    Муьхькемуьт серхьэдгьой иму,
    Саламети мемлекет.
    Гъэреул мезрегьой иму,
    Гьисдуьт муьхькеме пулат.
    Б. Гаврилов.

    Данил Борисович Данилов эз деде хьэсуьл омори 13-муьн май э 1982-муьн сал э кифлет жофокешгьо. Салгьой хундеи эн Данил гирошди э школей №8. Гьеле э вэхд хундеи э школе Д.Данилов бирмунди хуьшдере, чуьн зиреке, божоренлуье нубовегирдегор. Хьэвеслуь бире эки урокгьой физкультури ве НВП у э келе мерэгълуьиревоз бэхш вегирдебу э гьеммей спортивни мероприятиегьо, нушу доре оморебугьо э школе. Гьемчуьн Данил омбар муьхьшуьл бу эки ижире вид бэхьси, чуьн легкая атлетика. Унегуьре эри вегирлуь сохде школей хуьшдере уре чуьн божоренлуье спортсмене фуьрсоребируьт эри возире э спортивни бэхьсгьо эз комигьоки ченд гиле ведиремори бесгъунбер. Эри вегирдеи суьфдеи жигегьоре уре эз нуминей школе, спортивни школе, гьемчуьн администрацией шегьериш доре омори е ченд гIуьзетлуье грамотегьо ве призгьо.
    Бэгъдевой э барасиревоз школере варасдеи Данил Данилове бирени войге эри зиед сохде дананигьой соводи хуьшдере, унегуьре э 1998-муьн сал у гъобул бирени э Дербентски политехнически колледж. Омо эри уре хунде бегьем сохде уре муьгьлет нисе бире. Сал хунде э и коледж у межбур бирени эри вегирде академически отпуске.
    Э 2000-муьн сал гьеждегь сале томом бире, э гIэрей де жовоне ферзендгьой хэлгъ иму гуьре у рафдени э солдати эри э дуьруьсдиревоз бегьем сохде гъэрд хуьшдере чуьн гражданин Федерацией Уруссиет.
    Дуь сал (2000-2002-муьн) гъуллугъи эн жовоне гъэлхэндчи Ватан иму гирошдени э Оренбургски улке, дигьбон Тоцки (230 километрогьо эз шегьер Оренбург). Шеш мегьгьо у гъуллугъ сохди э подготовительни курсгьой войскегьой ологъи, э коминжоки гировунди миротворчески коргьой ологъире э гъизгъине точкегьой Абхазия, Чечня, Югославия ве диеш. Эзумбэгъдоиге е сал гъуллугъ сохди э подразделенией ологъи 3-муьн мотострелкови батальон, 433 полк э нум Донской казачествои, 27 гвардейски дивизиеи. Гъуллугъ сохде э территориегьой часть Данил Данилович гьеммишелугъ муьхькем гирдебу ологъигьоре э де подразделениегьойгеревоз. Э уревоз эеки гъуллугъ сохдебируьт омбаре догъистонигьо, гьемчуьн жовоне гъэлхэндчи гировундебу гIэрегьой дусдире э жовоне солдатгьой де улкегьойгеревоз, чуьн Башкирия, Казахстан, Чувашия, Татарстан ве диеш. Гьелбет, э везифей жовоне солдат дебу фегьмгири ве гъуьч сохдеи средствогьой ологъире, чуьн телефонни аппаратгьоре, коммутаторгьоре, переносни радиостанциегьоре. Гьелбет асант не бири эри жовоне гъэлхэндчи Ватан рэхьберьети сохде ижире вожиблуье ве жогьобдорлуье везифере.
    Э товун муьхькемлуьи ве гьэгъигъэте нишоней солдатире бирмундеи, Данил Данилове э гIэрей де жоборде гъэлхэндчигьойге бэхшире омори, гIуьзетлуье грамотегьо, ерлуье медальгьо. Э вэхд солдатире гъуллугъ сохдеи, эз гьемме пушоте суьфдеи гъэрхунди, комиреки Данил Данилов нори э пушой хуьшде, гьеммише бири эри жогьиле солдатгьо-курсантгьо бирмундеи хосиетгьой муьгьбети, игиди ве муьхькемлуьи поисдеире э гъэлхэнди Ватан ве хэлгъ хуьшде.
    Э 2002-муьн сал гъуллугъ солдатире бегьем сохде, Данил Данилов вогошдени э суьгъде шегьер гIэили хуьшде, гъэдимие Дербенд иму ве сер гирдени эри рафде рэхь жофои хуьшдере. Е сал кор сохде э рэхь бизнеси э 2003-муьн сал Д.Данилов дарафдени эри жофо кешире э 3-муьн завод «Радиоэлемент», эжеки корсохдени энжэгъ ним сал, чуьнки э оморе дегишигьой э завод, кутэхь сохде оморенуьт гъэдер корсохгьо ве у мундени корсуьз.
    Э 2007-муьн сал Данил Данилов дарафдени эри кор сохде э ДКСМ (Дербентски комбинат молгьой вокурдеи), эжеки гъобул бирени чуьн электрослесарь эз тараф гъуьч ве гъуллугъ сохдеи станокгьоре ве сенгъэбурранигьо мошингьоре. Э гIэрей эни салгьо жофокеширеи хуьшде у бирмунди хуьшдере чуьн жогьобдорлуье корсох ве дуьруьсде жофокеш.
    Изму жовоне, гъэзэгъэ ферзенд хэлгъ имуре, э келе жобордиревоз гъэлхэнд сохдигьо Ватан имуре ве э келе номуслуьи ве жогьобдорлуьиревоз жофокеширенигьо, гьисди е метлеб те эхир бегьем сохдеи вокурдеи хуней хуьшдере ве дировундеи э тозе хуне жовоне гIэруьсе. Имурешки имиди, ки егъин Данил мирасуь э нике метлебгьой дуьл хуьшде.
    Э эхир эни статья э гIуьзет «Руз гъэлхэндчигьой Ватан воисдени эз гьеммей дуьли-жуни омбаракбу сохде Данил Борисович Данилове э оморенигьо мигIидевоз. Хосденим эри эну ве гьемме мердгьо ве кукгьой иму жунсогъи, шори, шолуми ве гьеммише дире э зеверсер хуьшде темизе асмуре.

    Мататова Мая Боруховна

Поделиться этой страницей