Божоренлуье тербиедорегор ве гIилмчи

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]

    Хубе кукгьо – товуш хэлгъи кем нибу. У товуше, гьелбет, дошде гереки. ГIов эн чоле не дошдимге, хуьшг мибу, У гIов эриму гьеммишелугъ кумеки. Михаил Дадашев. Гьер сал 8-муьн февраль э гIэдот гуьре э вилеет иму нушу доре оморени гIуьзетлуье Руз гIилмчигьой Уруссиет. Э гьер девр, гьер хэлгъэ ве гьер миллете бири гIилм, культуре ве гIэдотгьо ю. Гьемчуьн гIилм ве культурере мэгIлуьмлуье одомигьоюш гьисди. Ужире одомигьо буьзуьрги ве келегеди хэлгъ имуни. Э жергей энугьо гьмчуьн деруьт жофодусде одомигьой хэлгъ имуш, комигьоки гьер вэхд хьозуруьт эри веноре гъувот эгъуьлире, дананире ве эшгъ дуьле эри гировунде э зиндегуни, норетгьо везифегьошуре. Имбурузиш э жергей омбаре хэлгъгьой Догъисту тен-бе-тен эдете кор сохденуьт одомигьой хэлгъ иму, комигьореки э хотур жоборде жофошу доре омори келе гIуьзет ве хьуьрмет. Изму э гIуьзет руз гIилмчигьой уруссиет мере воисдени шинох сохде хундегоргьой гозит имуре э бэхдевере ферзенд хэлгъ имуревоз, кандидат гIилми торихиревоз, доцент, серворлуье тербиедорегор эн Кабардино-Балкарски Хьуькуьметлуье университет Юрий Исаевич Мурзахановевоз. Юрий Мурзаханов эз деде хьэсуьл омори 12-муьн март э 1959-муьн сал э шегьер Нальчик. Э 1976-муьн сал Ю.Мурзаханов э барасиревоз варасди миенее школей №5 э шегьер Нальчик. Рэхь жофои хуьшдере у сер гирдени э завод «Стройдеталь», чуьн токарь. Э 1977-1979-муьн салгьо Юрий Мурзаханов рафдени э солдати эри гъуллугъ сохде э Лешгер Совети. Бэгъдевой солдатире варасдеи жовоне гъэлхэндчи вилеет иму вогошдени э суьгьде шегьер хуьшде. Эз гIэилиревоз хьэвеслуь бире эки хундеи уре бу войге эри вегирде буьлуьнде дананигьой соводире. Унегуьре э 1979-муьн сал у гъобул бирени э КБГУ (Кабардино-Балкарски хьуькуьметлуье университет) э факультет торихи, комиреки э барасиревоз варасдени э 1984-муьн сал. Бэгъдевой варасдеи университете Юрий Мурзаханов кор сохдени э школегьой №11 ве №30 шегьер Нальчик, эжеки дорени нубогьой торихи тербиевегирдегоргьой эни школегьоре. Оммо омбар муьхшуьл бире э торих, иллогьки э торих муьгьбетлуье хэлгъ хуьшде, э хьуьрметевоз дошде гIэдотгьо, дивэгIгьой хэлгъ хуьшдере у хьэрекет сохдени эри рафде э Москов ве хунде э очни тегьер аспирантурей Институт этнологиеи ве антропологиеи РАН. Артгьой хундеи эну э 1990-1994-муьн салгьо э и институт нушу доре оморени гъосуьт (тема) эн кандидатски диссертацией эну «Гьеймогьоине (современная) кифлет эн жугьургьой догъи э Кабардино-Балкарие», комиреки Юрий Исаевич э барасиревоз гъэлхэнд сохдени э 1994-муьн сал э ИЭА РАН. Изму экуьнди 15 салгьо, эз 1995-муьн салевоз те имбурузине руз, Юрий Исаевич Мурзаханов кор сохдени э КБГУ, э кафедрей технологии социальни коргьо. Э сенигIэт хуьшде гуьре «социальни корсох» гуьнжуьнди учебни-методически плангьо, э комики хундени лекционни курсгьоре э ижире дисциплинегьой хундеи: «Психотехнология межэтнически гъэножогъигьо», «Технология социальни коргьо э межэтнически овхьолет», «Синогъи социальни кор э жире-бе-жире десдегьой могьлугъэвоз» ве диеш. Омбаре гъэйгъукеши ве фикир дорени у э пуьрсуьшгьой вомухдеи ве хуте сохдеи жовонгьоре. Студентгьой хуьшдере Юрий Мурзаханов хундени неки э сенигIэт хуьшде, гьемчуьн у дорени угьоре хубе несигIэтгьо, чуьтам гьер одоми неки э гьеррузине кор хуьшдеревоз, гьемчуьн э хубе хосиетгьо, дивэгIгьой хуьшдеревоз бие э жиге биеру гъэрхунди хуьшдере э пушой хэлгъ, эн вилеет, эн келете одомигьо, эн бебе-дедей хуьшде. Бэхшвегир Союз журналистгьо РФ Юрий Исаевич талантлуье гIилмчини, автор эн омбаре верзирение жофогьой гIилмини. Эз гъэлем автори эну гуьнжуьнде ве дофус зере омори се книггьо ве е ченд статьягьо эз тараф торихи, этнологиеи, историеграфиеи хэлгъгьой Софун Кавкази, э комики офди хуьшдере лугъонде данани, келе синогъи гIилми, э комики у кор сохдени ве уре параменд сохдени. Омбаре данандеи ве хьэрекетигьой хуьшдере дори Юрий Мурзаханов эри хьозур сохдеи ве дофус зереи книге «Горско-еврейский этнограф Илья Шеребетович Анисимов», ведиреморигьо э 2002-муьн сал э Москов ве биригьо лап хубе бэхш эри хундегоргьой хэлгъ иму. Книг нуьвуьсде омори э товун хьозурлугъи ГIилмлуье сессия эз тараф Институт этнологиеи и антропологиеи РАН, Уруссиетлуье фонд дошдеи ве параменди культурей жугьури, нушу доре оморигьо э гIуьзет 140 сали эз руз хьэсуьл омореи ведилуье этнограф И.Ш.Анисимов – гуьнжуьндегор суьфдеи монография э товун жугьургьой догъи. Э товун эни книг эдее э ер овурде хуьшдени гуьнжуьндегор эни книг: «Я длительное время занимался изучением жизни и деятельности первого горско-еврейского этнографа И.Ш.Анисимова, буквально по крупицам собирая о нем данные, находящиеся в центральных архивохранилищах, разбросанных на страницах периодических изданий конца ХIХ - начала ХХ века, ставшего в настоящее время библиографической редкостью». Гьисди уре фикир, ки эри дуьборе дофус зере книге э товун И.Ш.Анисимов, чуьнки э песини салгьо ошгор сохде оморет е ченд мерэгълуье фактгьо эз зиндегуни эну. Юрий Мурзаханов бэхшвегир эн омбаре гIилмлуье конференциегьои, гуьнжуьнде оморетгьо э товун пуьрсуьшгьой торихи ве этнографиеи жугьургьой догъи Кавказ, нушу доре оморетгьо э е ченд шегьергьой гIуьлом (Москов, Баку, Тель-Авив, Иерусалим, Дербенд). Э Суьфдеи съезд эн ГьемгIуьломлуье конгресс жугьургьой догъи, гирошдебугьо э 2003-муьн сал э Тель-Авив, Юрий Исаевич гоф сохдебу э докладевоз эз нуминей гIилмчигьо, мерэгълуь гьисдуьтгьо э торих ве этнографией жугьургьой догъи, ве теклиф сохд эри дофус зереи периодически дофусигьоре, э комигьоки фегьм сохде миев пуьрсуьшгьой торих ве культурей жугьургьой догъи. И пушогьо э дофус зере оморигьо э Ершолеим пособией хундеи « Торих ве культурей жугьургьой догъи Кавказ», нушу доре оморет е ченд торихлуье-этнографически очеркгьо, еки эз бинелуьгьой комигьоки мибу хисоб сохде «Хронологией вожиблуье датегьоре эз тараф торихи ве культурей жугьургьой догъи». Изму Ю.Исаевич Мурзаханов хьозур сохди эри дофус зере монографиере Жугьургьой догъи эн Кабардине-Балкарие, э комики автор имидлуьни, ки книг дофус зере миев гуфдире имисал э шегьер Махачкале э кумеки «Кавказски меркез иудаикеревоз» ве рэхьбер энуревоз И.Г.Семеновевоз. Эдее хьозур сохде оморе эки дофус зереи дуь книггьойгеш: «Эвленмиши ве биннуьши гIэруьси эн жугьургьой догъи» ве «Историография торихи ве этнографиеи жугьургьой догъи», комигьоки мибу зиед сохдеи (продолжение) эн жофой энуре «Очерк торихи эн хундеи этнографически хундеи жугьургьой догъи (ХVIII-сер XX-муьн девр)». Э эхир статья воисдени гуфдире, ки Юрий Мурзаханов неки талантлуье гIилмчини, тербиедорегор студентгьои, у гьемчуьн хубе сэхьиб эн кифлетиш гьисди. У э зен хуьшдеревоз веровундет вомухдет, хубе тербие дорет духдер хуьшдере Надеждаре, комики варасди школере э суьрхине медалевоз, ве э гьеймогьоине вэхд эдее гъобул сохде дуь зеверие идорей соводире: Пятигорски лингвистически университете, факультет гIэрейхэлгъие ологъигьоре гьемчуьн филологически факультет эн Кабардино-Балкарски хьуькуьметлуье университете. Надежда бебей хуьшдере хуно э кор хуьщде омбар хьэвеслуьни ве э лоигъи ве жогьобдорлуьиревоз кеширени жофо. Юрий Исаевиче келе хьуьрмети э гIэрей дусдгьо-хьэрмэхьгьо, шинохгьой хуьшде, комиреки у гъобул сохди э божорени ве дуьруьсде жофой хуьшдеревоз. Э пушорэхьи мигIид гIилмчигьо хосденим эри Юрий Мурзаханов ве гьеммей гIилмчигьой Уруссиет жунсогъи, шори ве диеш расиреи э буьлуьнде барасигьой творчествои.

    Мататова Мая Боруховна

Поделиться этой страницей