Дин-догIотлуье-политически экстремизм ве жэгIмиет

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Чуьтам мэгIлуьм гьисдиге, пуьрсуьшгьой гъовхо бердеи э экстремизм ве диеш секонелуье тараф энуревоз – терроризмевоз изму тижлуь нушу доре оморени э Республикей Догъисту.
    Э лингвистике (гофноме) гоф «экстремизм» нушу доре оморени чуьн «поисдеи э гъирогъ, хэйли дур эз мигле». Бинелуье мэгIэной эн экстремизм гьисди гьеммише гуьнжуьндеи овхьолет секонеи ве сокитсуьзире.
    Гьелбет, ошгорлуьи экстремизм э дин-догIотлуье сфере – гьисди гьозие овурдигьо социальни-экономически ве политическ кризисе э Уруссиет, гирошдеи эз е жэгIмиетлуье системе эки екийге. Артгьой эн ижире дегишигьо овурдет эки гъэлхэндсуьз биреи зиндегуни омбарегIэиллуье кифлетгьо, шуькестгьо, михьтожлуье кучмишбирегоргьо, зенгьо ве жовонгьо.
    Э гIэрей вогьнегьой, кумек доребируьтгьо эри гужлуь биреи дин-догIотлуье-политически, экстремизм гереки гуфдире э товун кор сохдеи девилеетлуье дин-догIотлуье ве политически меркезгьо, комигьоки хьэрекет сохденуьт эри дуьшменире лов сохдеи э вилеет иму.
    Эки хьэйфбери гереки гуфдире, ки э Софун Кавкази э гIэрей энугьо э Догъистуш, омбаре пуьрсуьшгьо эз тараф экстремизм зиедие тегьер гужлуьнуьт, той сохде омоге э Меркезлуье районгьой Уруссиетевоз. Измуине овхьолет э Догъисту нушу дорени гьэгълуье терсдии (угроза) овхьолет секонезуьзе регионе ве Уруссиете. Зиедие терсдиире эри согълуьи вилеет иму нушу доренуьт дорунлуье четинигьо ве гъэршуйхьуькуьметлуье кор сохдеи дин-догIотлуье экстремистгьо ве миллет-сепаратистки десдегьо ве гуьрдлемегьо.
    Э имбурузине руз омбар вожиблуьни эри варасиреи ве андуьрмиш сохдеи э жэгIмиет, э чуьжире ологъигьо деруьтге дин-догIотлуье гIэдот ве дин-догIотлуье экстремизм.
    Э гIэрей уруссиетигьо 20 млн. одомигьо гирденуьт дин исламире, комигьоки зигьисденуьт э овхьолет дусди ве шолуми э де дин-догIотлуьгьойге-ревоз ве гирденуьт мейл энугьоре эри поисдеи э гъэршуй экстремизм ве берде э уревоз гъовхо.
    Э гьеймогьоине вэхд фегьм сохде оморени буше тегьер кор сохдеи эз у тараф.
    Еки эз приоритетни тарафгьой кор сохдеи прокуратурей республикейму гьисди гъовхобердеи э гъэршуй экстремизм. Пуьрсуьшгьой гъовхобердеи э экстремизм ве терроризмевоз е ченд гиле пуьруьш сохде оморет э гуьрдлемегьой гъонундорлуье органгьой республикейму.
    Э 2007-2008-муьн сал ве гирошдигьо вэхд 2009-муьн сал аппарат прокуратурей республике гировундент фегьмгиригьоре бегьем сохдеи гъонундоригьоре э гъэршуй экстремизм э районгьо, эжеки нушу доренуьт криминогенни овхьолет: Унцукульски, Карабудахкентски, Гунибски, Дербентски, С.Стальски, шегьер Дербенд ве Буйнакск. Назарлуье фегьмгиригьо гировунде оморенуьт э Карабудахкентски, Гунибски ве Табасарански районгьо. Гировунде оморетгьо назарлуье коргьо бирмунденуьт, ки омбаре муниципальни идорегьо нисе доренуьт дузе хьисобгьой эн е гъэдер кор сохдеи дин-догIотлуье ве жэгIмиетлуье гуьрдлемегьоре. Омбаре администрациегьо нисе эрз сохденуьт э товун гъэдер рафдетгьо эри хундеи э де вилеетгьойге ве вогошдетгьо, бэгъдовой хундеире бегьем сохдеи. Артгьой гировунде оморетгьо фегьмгиригьо, э гIэрей энугьо назарлуьгьош, шогьодъети доренуьт, ки органгьой хуьшденлуье рэхьберьети, неденишире э нушу доренуьтгьо кемсуьгигьо э гуьнжуьндеи коргьо э гъэршуй экстремизм нисе доренуьт зиедие тигъэт хуьшдере эри гъовхо берде э зиеде гъувотевоз.
    Фегьм сохде оморени кемсуьгигьо эз тараф кор сохдеи гъонундорлуье органгьо э могьлугъэвоз э суьфдеи нубот эз тараф участкови уполномоченнигьо, гъуллугъигьой ГИБДД ве ППС. Унегуьре омбаре бэхшвегиргьой гъонунпузмишлуье десдегьо омбаре вэхд зигьисденуьт э шегьергьо ве районгьой республике, гешденуьт э сер транспорт ве мунденуьт э сое. Гьелбет, гереки гуфдире, ки не биреи кумек эз тараф могьлугъ, омбар четини эри расире э барасигьо ве гуьнжуьндеи овхьолет секонесуьзире.
    Вегирде э тигъэт, ки гъонундорлуье органгьо омбардекиш гъовхо берденуьт э гирошде фактгьой экстремизмевоз, гереки гъобул сохде гъонундорлуье актгьоре, эжеки эз бине телеф сохде миев раггьой экстремизм э суьфдеи этапгьой лов биреи эну. Диеш гереки гировунде коргьоре эри зевер сохдеи могьлугълуье культурере, нушу доре оморенигьо э гъэршуй экстремизм.
    Гуфдире э товун средствогьой хэбергьой могьлугъи гереки эз тараф энугьо гировунде зиедие хьэрекетигьой хуьшдере эри эрз сохде э товун зарали овурденуьтгьо экстремизм э мэгIэной хуьшдеревоз. Гереки очугълуь хэбер доре эри хундегоргьо ве гушвенорегоргьо гьеймогьоине мэгIэной гIилми ве вожиблуьи культурни гIэдотгьо ве гьемкультурни гофсохдеире.
    Э эхир воисдени гуфдире, ки эри тиже тегьер гировунде гьемме коргьой гъовхоберире э гъэршуй экстремизм ве терроризм егъин гереки эри гуьрд биреи эеки жэгIмиет ве хьуькуьмет. Хьуькуьмет мие терг соху социальни-экономически ве политически овхьолете, комики дорени минкини эки гуьнжуьнде омореи экстремизм. жэгIмиет, ки э гIэрей комигьоки деруьт жэгIмиет-луье гуьрдномегьо, СМИ, могьлугъ мие пою э гъэршуй экстремизм, нушу доре одомихогьлуье мэгIэной политически ве дин-догIотлуье толерантносте, граждански шолуми ве разимендире.
    Мататова Мая
    Дагестанская республиканская газета "ВАТАН" на горско-еврейском языке

Поделиться этой страницей