Дуьруьсде жофокеш

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]

    Инсон имидсуьз мибисдоге Гьич ни зигьисд э руй хори. Имид инсон ни бисдоге, У ни вини бэхдевери. Инсон имидсуьз мибисдоге, У гьич вэхд ни кеши жофо, Имид инсоне ни бисдоге, У ни вегирд эз у софо. М.Гаврилов. Бэгъдевой пенжимуьн салгьо гирошдеигьо девр, э гIэрей садсалигьо кем не дебируьт одомигьо, комигьоки гирдебируьт буьлуьнде гъуллугъигьоре. Э гъэдимие шегьер Дербенд экуьнди э гьемме бинелуье промышленни объектгьо кор сохдет нушудорегоргьой жугьурлуье жэгIмиет Э гIэрей энугьо: Семен Ильдатов, Зимро Рахмилов, Марат Рахмилов, Сергей Гаврилов, Михаил Гилядов, Михаил Сосунов, Яков Захаров, Ази Гилядов, Беньямин Хазанов, Роберт Нахшунов ве диеш. Эз заводгьо ве фабрикгьо бэгъэй бируьт директоргьой школегьо №11, 115, 20, э шеш колхозгьо сернуьшгьо бируьт жугьургьой догъи. Шлифовальни станкгьоре сохденигьо завод хуб мундет э ер дербендигьо. Завод гуйге жейле сохдебу шегьере э дуь бэхш : меркезлуье бэхш ве тозе микрорайон «Махачкалинский проспект». Серворлуье инженер эни завод бу Семен Соломонович Урман. Э рэхьбери завод гьемчуьн дебу техникум, сервор комики бу Илья Агашияевич Ильяев. Имбуруз э товун эни гъовум ме мере воисдени ихдилот сохде. Гьисмет гьер одоми –гьисди е бэхш торих хэлгъ, бэхш вилеет. Илья Агашияевич хьэсуьл омори те Буьзуьрге довгIой Ватани сер гирде, э 1937-муьн сал. Келе-келебебей эну э кифлет хуьшдеревоз э омбаре гьемватанигьой хуьшдеревоз кучмиш бире эз догъистонлуье дигь Орогъ, оморебируьт эри зигьисде э шегьер Дербенд э 1901-муьн сал.Те омореи э Дербенд угьо кошдебируьт мугъоресе, бофдебируьт холигьоре ве фурухдебируьт угьоре. Оммо оморени вэхд, ки э жигей мугъорес сенигIэткоргьо ранг зеренуьт русмугьой пешмире э искусственни ранггьоревоз, унегуьре эри кошде мугъоресе хьэйр нисе бире, унегуьре вир сохде куьгьне пишешуре угьо межбур биренуьт эри зигьисде э меркезлуье, дузгунлуье мескенгьой Кавказ. -Э гъумолет иму,- эдее сер гирде ихдилот хуьшдере И. Ильяев нумгьо гирошденуьт эз е эрхэ те де эрхэигегьо. Нум келебебейме бу Илья, нум ме не нум невей меш гьисди Илья. Бебей эн Илья Агашияевич нушу доре оморени чуьн суьгьде бирор эн Ливгъо келедедей ме. Э вэхд вохурдеиме э и одомиревоз ме дануьсдуьм омбаре мерэгълуье ихдилотгьо эз торих гъумолет иму. Бебей келедедейме э 1922-муьн сал хьэрекет сохдебируьт эри вадарафде эз вилеет э Эрец-Исроил. Зурие тегьер фурухде хунере угьо оморенуьт э Батуми эри эз унжо э сер геми симов зере оморе э Гъэдуьше хори. Оммо хьуькуьм Совети сэхд сохде рэхьгьой дерьегьире, кифлет вогошдени э Дербенд. Келедейме увэхди томом биребу паздегь сале, рафденге э шуьвер э келебебейме Авие, кифлет комигьоки кучмиш бире оморебируьт эри зигьисде э Дербенд эз дигь Гъэрчогъ, эжеки у кор сохдебу сернуьш колхоз. Э шегьер Дербенд уре не бири зиедие можол эри кор сохде э колхоз, чуьнки хьисоб сохде оморебу чуьн «дуьшмен эн хэлгъ», эзу товун у куьшде оморебу ве монуьхо биребу э бите-хьэимгьой шегьер Махачкале. Школере варасде бэгъдо Илья Ильяев гъобул бирени э Московски Хьуьуьметлуье Университет э механико-математически факультет. Э барасиревоз варасде уре э 1960-муьн сал, у дарафдени эри кор сохде э гIилмлуье исследовательски институт ракетостроения. Э ижиге Илья Агашияевич кор сохдени чор сал, чуьн инженер-математик: эеки э коллегегьой хуьшдеревоз фегьм сохдебируьт траекториегьой учмиш биреи космонавт Юрий Титов. ГIэре не кешире эз Дербенд оморени телеграмма, бебей ю гурунд нечогъи гуфдире ве у чуьн е теклуье кук эну мие егъин вогордуь э хуне. Агашия Ильяев (нум ю э ники гирде биево) кор сохдебу э колхозгьой Дербенд чуьн рэхьбер сэхьиблугъи. Дануьсде э товун вокурде оморенуьтгьо э Дербенд шлифовальни станокгьо сохденигьо завод у дарафдени унжо эри кор сохде. Э пушой завод гьово гирде оморебу пуьрсуьш э товун хьозур сохдеи инженергьо ве технологгьоре. Илья Агашияевиче гьеебо доренуьт должность директор эн станкостроительни техникум. Гереки гуфдире, ки у бу еки эз ведилуье идорегьой хундеи э Дербенд, комики хьозур сохдебу сенигIэткоргьоре эри се дуьруьжде шегьерлуье заводгьо- «Радиоэлемент», «Радиосигнал» ве шлифовальни станокгьо сохденигьо завод. Мерэгълуьни, ки у гъозие э у заводгьо кор сохдебируьт 7500 одомигьо ве хьозур сохдебируьт ве фуьрсоребируьт молгьоре э шегьергьой эн гьеммей Союз Совети. Трансформаторгьо эри радиоприемникгьо ве телевизоргьо, станокгьо эри заводгьо ве диеш. Станкостроительни техникуме гьисди се факультет. «Обработкей металлгьо, радиоаппаратостроение», «Планирование хэлгълуье сэхьиблугъи». Варасдегоргьой техникум вегирдебируьт сенигIэт-гьоре техник-технолог ве радиотехник. Гьер сал техникум хьозур сохдебу 90 квалифицированни технологгьо. Э вэхд 33 салгьо, эз 1964-муьн те 1997-муьн салгьо э книжкей жофои Илья Ильяев нушу доре оморебу дуь записьгьо-директор техникум ве нубодорегор высши математике. Э вэхд 33 сал кор сохдеи ме чуьн директор техникум,- гуфди И.Ильяев,- ме гъул кеширем экуьнди 2200 дипломгьоре. Изму 700 эз варасдегоргьо зигьисденуьт э Исроил. Эз 1967-муьн те 1972-муьн сал э техникум шлифовальни станокгьо э барасиревоз кор сохдебу филиал Догъистонлуье Хьуькуьметлуье Университет, эжеки студентгьо гирошдебируьт жэгIмиетехнически курсе те се сал, бэгъдевой уре варасдеи рафдебируьт э ВУЗгьой Махачкале, Орджонекидзе ве Новочеркаск. Еки эз суьфдеигьо эз кифлет Ильяевгьо рафдебу э Исроил э 1989-муьн сал э кифлет хуьшдеревоз. Келеи кук эну Альберт варасдебу Московски медицински институте ве кор сохдебу э Москов хирург. Изму назир Элькана Илиав зигьисдени э Ершолеим ве гьисди еки эз вегирлуье одомигьо э гIэрей жугьургьой догъи. Э вэхд суьгьбет гировундеи иму Илья Агашияевич ихдилот сохди э товун гIэилгьо, невегьой хуьшде. И пушогьо оморебу э Москов э гъуногълугъи эки духдер хуьшде. Изму э шегьер Орот экуьнди пенж сал рэхьберьети сохдени клуб пенсионергьоре. - Э клуб иму деруьт чуьл одомигьо, иму гировунденим жире-бе-жире мероприятиегьо, рафденим э экскурсиегьо. Э эхир воисдени гуфдире ки, одомигьо, чуьн лелейме Илюша, гьемише бирет ве гьисдуьт чуьн эшгълуье бэхшвегиргьой, энжомосох эн гьемме сергирдеигьо ве дуьруьсде синогъи энугьо миеруьт омбаре хэйре эри хэлгъ хуьшде. Илья Ильяев гьисди еки эз ужире дуьлтиже одомигьо, комиреки гьисди келе хьуьрмет ве гIуьзет э гIэрей гIэилгьо ве жэгIмиет хуьшде. Хана РАФАЭЛЬ
    Мататова Мая Боруховна

Поделиться этой страницей