Э муьгьбетевоз эки жофо

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Э муьгьбетевоз эки жофо

    [IMG]Э гъэдимие шегьер Дербенд иму омбар деруьт одомигьо, комигьоки э дуьруьсде жофой хуьшдеревоз гъэзенж сохдет э гIэрей хэлгъ хуьшде келе хьуьрмет ве гIуьзет. Комбинат коньяксохи шегьер Дербенд, комики гьисди еки эз пушолуьгьо, келе ве омбармиллетлуье коллективи, э гIэрей корсохгьой комики дери келе ве муьхькемлуье дусди. Э товун барасигьой эни комбинат ве жофокешгьой эну иму омбар нуьвуьсдебирим э нуботлуье верэгъгьой гозит иму. Герме, товушлуье рузгьой гьеминон бу. Э тапшуьрмиши серворлуье редактор гозит « Ватан» рафдебируьм э комбинат коньяксохи эри нуьвуьсде э товун жофокеше корсохгьой эну. Дироморе э розливни цех, рэхьбери комиреки ченд салгьо эдее берде Семен Заволунович Гилядов, ме фегьм сохдуьм, ки гьер одоми э эшгълуьиревоз эдембу бегьем сохде э пушою норе оморебугьо везифере. Семен Заволунович гьечи гуьнжуьнди коре, ки корсохгьой мескен корисохи хуб дануьсденуьт гъэрхундигьошуре ве тегьергьой кор сохдеишуре. Э гIэрей корсохгьо э келе жогьобдорлуьи ве номуслуьиревоз эдете жофо кеширенуьт е ченд салгьо ферзендгьой хэлгъ иму, чуьн Нувахова Ида, Зарбаилова Татьяна, Исакова Шура, Беньяминова Галя, Хизгилова Валентина, Манаширов Исроил, Мишиева Оля. Меслэхьэт сохде э угьоревоз, угьо тевэгъэ бисдоруьт эки ме эри нуьвуьсдеи э товун дедей эн Оля Мишиева, комики гьисди еки эз хьуьрметлуье корсохгьой коньячни комбинат. Унегуьре ме диреморуьм э склад эн хьозуре мэхьсуьлет, эжеки э ме вохурд миенее бала, очугъэ сифет, ловхэндее зен урусси. Э товун Татьяна Ивановна Мишиева ме шиновусдем омбар хубе, тэгIрифлуье гофгьо. Екем шинохденуьм гъовумгьо-куьнде одомигьойюреш. Оммо э хуьшдени Татьяна Ивановнаревоз ме те имогьой шинох не бируьм. Унегуьре ме руй бисдоруьм эки ю эри ихдилот сохде э товун зиндегуни ве жофокеширеи ю. Татьяна Ивановна хьэсуьл омори э 1945-муьн сал э шегьер Новочеркаск улкей Ростов э кифлет жофокеш. Э барасиревоз бегьем сохде хундеире э школе Татьяна дарафдени э Новочеркаски политехнически институт э химически факультет э сенигIэт шише ве сеталлы. Бэгъдевой институте варасдеи, зиреке ве божоренлуье духдире э тапшуьрмиши институт гуьре э 70-муьн салгьо фуьрсоренуьт эри кор сохде э Догъисту, э Огнински завод шишеи, эжеки жогьиле инженере норенуьт рэхьбер эн цех пенжерелуье шишеи. Э гъисмет хуьшде гуьре шинох бирени э жовоне ферзенд хэлгъ имуревоз Мишиев Эдуард Исраиловичевоз ве рафдени э у э шуьвер. Эз 1971 те 1989-муьн салевоз жоборде зен кор сохдени э завод «Электросигнал» шегьер Дербенд, чуьн ведилуье технолог э отдел серворлуье технолог (ОГТ). Э гIэрей эни салгьо Татьяна лугъонд варасире вожиблуьи кор хуьшдере, келе жогьобдорлуьии энуре бирени усдой кор хуьшде. Э вэхд жофокеширеи хуьшде э и корхоне э келе номуслуьиревоз кор сохде у гъэзенж сохди келе хьуьрмет э гIэрей корсохгьо ве рэхьбергьой завод. Э келе жогьобдорлуьиревоз кор сохде Татьяна Ивановна бири бэхшвегир е ченд грамотегьой гIуьзети ве пуллуье премиегьо. Гирошденуьт салгьо. Дегиш бирени социальни-политически овхьолет э Уруссиет. Гьелбет дегиш бирени овхьолет зиндегуни инсонгьо. Э овхьолет зиндегуни хуьшде гуьре э 1998-муьн сал Татьна Мишиева диреморени эри кор сохде э еки эз ведилуье корхонегьой Догъисту э комбинат коньяксохи шегьер Дербенд, гуьзеле коньякгьой комики фирегьу мэгIлуьмлуьнуьт неки э вилеет иму, гьемчуьн э де вилеетгьойгей гIуьломиш. Изму дегь сал гирошди эз у рузевоз, кейки суьфде вокурде дервозей эни комбинате диреморени эри кор сохде э цех хьозуре мэхьсуьлет (цех готовой продукции), гуьн технолог эни цех. Имбуруз у гьисди омбар синогълуье ве дуьруьсде корсох, комики эшгълуье бэхш вегирдени э жэгIмиетлуье овхьолет зиндегуни комбинат коньяксохи. Э везифей Татьяна Ивановна Мишиева дери фуьрсоре хьозуре продукциере, дечире оморетгьо шешегьой коньякире э гъутигьой кортонни, э жире-бе-жире регионгьой вилеет иму. Э вэхд суьгьбет гировундеи иму, ме винируьм, ки э пушой ме поисди гуфдире гъэгъигъэте сенигIэткор, дуьлочуьгъэ ве дусдхогье одоми, э комиревоз хьэз оморе гоф-мэслэхьэти сохде. Э гIэрей десдей коллектив хуьшдеш уре дери келе хьуьрмет, чуьнки бире хьэвеслуье одоми э уревоз хьэрекет сохденуьт эри берде дусдире омбаре жовоне корсохгьой комбинатиш. Татьяна Ивановна Мишиева неки дуьруьсде корсохи, у гьемчуьн хубе дедей кифлетиш гьисди. У эеки э шуьвер хуьшдеревоз дошдет се бэхдевере ферзендгьоре: Татьяна, Станислав, Ольгаре. Гьер се энугьо хунде бегьем сохдет зевери идорегьой соводире. Имбуруз келеи гIэилгьой энугьо Таня ве Станислав зигьисденуьт э кифлетгьошуревоз э вилеет Исроил. Чуьклеи духдер – Ольга хунде бегьем сохди ДГУ, экономически факультете, изму ченд салгьо кор сохдени э еки э дедешуревоз э комбинат коньяксохи, чуьн администратор налогови структуре, норе штрихгьой код э сер акцизни маркегьо ве диеш. Чуьтам э жогьобдорлуье гъуллугъигьой хуьшде бирмунде желдлуьи ве божорени хуьшдере, жофо кешире эз дуьли, бирмунде хубе нишонегьоре, гье ижире тегьер вомухунди ферзендгьой хуьшдереш. Гьер руз Татьяна Ивановна эз кучегьой гъэдимие шегьер рэхь хуьшдере э кор гирошденге, ве гьербо э пушой чумгьо келе цехгьой завод веди биренге, эз дуьл эну гирошдени эрклуьи ве шори, комигьоки мугуиге зиедтеш гъувот ве хьэвес доренуьт уре, чуьнки завод гъисмет юни, ве у лап разини эз гъисмет хуьшде. Имуреш ки, эз дуьли воисдени хосде эри Татьяна Ивановна Мишиева ве кифлет эну жунсогъи, ники ве диеш расиреи э буьлуьнде барасигьой жофои.

Поделиться этой страницей