Э жофо деригьо гIуьмуьр

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Э жофо деригьо гIуьмуьр

    [IMG]Гьер жофокеш согъэ хори Э мэгIдонгьой эн жофои, Доге бэхше э кор жэгIми, Борже берде эри були. Б.САФАНОВ. Сер ебо вохурденге э келете одомигьоревоз мере воисдени куьндте шинох бире э угьоревоз эри ихдилот сохде эри хундегоргьой гозит иму э товун энугьо, чуьнки рэхь жофои ве зиндегуни энугьо верзиренуьт эри дануьсдеи э товун энугьо жовоне ферзендгьой хэлгъ иму. Э гIэрей эни ченд салгьо э верэгъгьой гозит иму, омбаре тэгIрифлуье гофгьо нуьвуьсде оморет э товун мэгIлуьмлуье сенигIэткоргьо, чуьн духдиргьо, нубодорегоргьо, инженергьо ве чендигьойгеш, комиогьки гьер гъуллугъ хуьшдере веровунденуьт э келе жогьобдорлуьиревоз. Оммо деруьт э шегьер иму ужире одомигьош, комигьоки бэхширенуьт гIуьмуьр хуьшдере э гъуллугъ эн вихде оморигьо сенигIэт хуьшде. Еки эз ужире сенигIэткоргьо гьисди усдой кор хуьшде Зинаида Хананьяевна Данилова. И пушогьо дер редакциеймуре вокурде диреморебу огьиле зен хэлгъ иму эри гуфдире келе согъбоши эри дофус зереи э товун усдой дерзи Довид, комики бирени бирор эн зэгIэмле ю ве бирорзерей келедеде ю. Шинох бире э уревоз, мере воисд ихдилот сохде э товун жофодусде, гьеммише э десгьою кор дебиригьо, эз жофо тоймиш не биригьо зен хэлгъ иму. Гьелбет, зэхьмет инсон, жофо ю э вэхд зиндегуни – хьуьрмет не гIуьзет юни, чуьнки жофо гьисди мэгIэной согъ зиндегуни одоми. Зинаида Данилова эз деде хьэсуьл омори э мегь октябрь э I945-муьн сал э гъэдимие шегьер иму Дербенд э кифлет жофокеш. Гъумолет бебе-дедей эн Зинаида бу эз дигь Гъэрчогъ. Бебей эну Хананья Данилович ченд салгьо жофо кешири э колхозгьой Дербенд, эзумбэгъдоиге кор сохди чуьн заготовитель. Дедей эн Зинаида – Роумо омбар жофодусде одомиш буге эри кор сохде уре минкини не бири, чуьнки эдембу дошде 7 (2 кук, 5 духдергьоре) дуь э песой еки зенде оморе гIэилгьоре. Э келе кифлет дошде вероморе гIэилгьо хуб дануьсдет гъэдуьр дусди ве шолумире. Бироргьо, хэгьэргьо гьеммише кумек бирет дуь эки, келете гIэилгьо поисдет э гъэлхэнди чуьклегьо. Бебей Зинаида келе зэхьмет кеширебу эри дошде веровунде келе кифлете, ве гьеммише несигIэт доренбу гIэилгьой хуьшдере э жофокеши хуте биреи ве гьемчуьн жофоре хьуьрмет гирдеи. Э омбаре гIэиллуье кифлет хуьшде Зинаида бу шешимуьн ферзенд. Хунде томом сохде шеш классе э школей №3 Зинаида межбур бирени эри рафде жофо кешире э корхоней парталдухи э нум Ш. Алиев. Жогьиле духдер бу Зинаида, кейки вокурдебу дер корхоней парталдухире, ве ологъолуь сохдебу уре э гъисмет хуьшдеревоз. Э везифей тозе шегуьрд дебу кор сохде э гердовунегьой шеигьоревоз, чуьн ручнице, ути зере ве чарунде угьоре. Гьелбет, зигьисдегоргьой шегьер хуб дануьсденуьт, чуьжире пушолуье ве дуьруьжде корхоней парталдухи буге увэхди фабрике э нум Ш.Алиев. Синогъи эн жовоне корсох руз-бе-руз эденбу зевер бире. Тигъэтлуьи ве хьэрекетлуьи хуьшдере у бирмундени э желдлуье жофой хуьшде гуьре. Э ер овурде рузгьой корисохи хуьшдере, Зинаида Данилова э келе хьуьрметевоз гуфдиребу э товун рэхьбергьой фабрик Марат Рахмилов, Сергей Гаврилов, комигьоки омбаре тигъэт хуьшдере доребируьт эри ведиремореи фабрике э пушо, чуьнки угьо духде шеигьо, комигьоки бируьт омбар качестволуь, фуьрсоре оморебируьт э е ченд шегьергьой Уруссиет. Жофолуье коллектив эн фабрикей парталдухи бу омбар жофодусд ве э четине мэхьэл егъин кумеки мисохдуьт дуь э еки. Уни е бэхш инсоньети. Жогьобдорлуьи Зинаида эки кор сохди уре диеш хьуьрметлуь. Э омбаре хьэрекетигьой хуьшде гуьре, муьгьбетлуь бире эки сенигIэт ве э келе войгеревоз гьер жирегьой кор хуьшдере дануьсдеи, у гьер тарафлуь бири дананменде усдой эн сенигIэт хуьшде. Унегуьре жогьиле корсохгьо хьэрекет сохдет э уревоз эри той бире. Зинаида Данилова бэхшири синогъи хуьшдере жогьиле шегуьрдгьоре, гьечи хуте сохде угьоре, ки сенигIэт ишу гьеммишелугъ э хуш ишу биев гуфдире. Экуьнди 40 салгьо жофокеширеи э корхоней парталдухи Зинаида Хананьяевна дануьсди э келе хьэрекетигьой хуьшдеревоз гъэзенмиш сохде хьуьрмет ве муьгьбете неки э гIэрей десдей жофокешгьо, гьемчуьн э гIэрей могьлугъиш. Расде гуфдиренуьт, ки жофо буьзуьрг сохде одомире, хьэвеслуьи доре инсоне. Суьгъде гIуьмуьр Зинаида э муьгьбетлуье жофой ю дебири. Э хотур номуслуье жофо несигIэтчие корсох е ченд гиле веноре омори э Тэхдей гIуьзети. Гьемчуьн эри зарблуье жофо уре доре омори е ченд грамотегьой гIуьзети, гьемчуьн премиегьой пулиш. Э 200-муьн сал Зинаида Данилова рафдени эри форигъэти вегирде. Омбаре четинигьош дириге э вэхд зиндегуни хуьшде Зинаида Данилова бири омбар дуьлтиже одоми, омбар дусд бири эки кифлетгьой хэгьер-бироргьой хуьшде. Э гъисмет хуьшде гуьре, Зинаида э шуьвер не рафди, оммо чуьн суьгъде гIэилгьой хуьшдере хуно дошди веровунди дуь кукгьой эн шуькесте бирор хуьшдере. Е ченд салгьо зигьисде э вилеет Исроил э 2006-муьн сал Зинаида Данилова вогошдени э суьгъде ватан хуьшде. Омбар хубе гофгьо гуфди Зинаида Даниловна эз тараф гъуншигьой хуьшде, комигьоки гирденуьт хьуьрмет юре ве кумеки доренуьт э четине вэхд ю. Имуш эдее хосденим эри эну жунсогъи, ники, дуьлдинжи биреире.

Поделиться этой страницей