Эз гъумолет э гъумолет

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Эз гъумолет э гъумолет

    Зурбое дегишигьо сохдет, кем ишу мундетгеш э руй хори, имогьоине эрхэ огьиле одомигьой Уруссиет. Эз гъумолет э гъумолет гирошдет у келе барасигьо. Эз сербошден бие гую э товун буьзуьрге бесгъуни э Келе довгIой Ватани. 27 миллион гьемватанигьойму телеф бирет э муьлкгьой бесхунигьо э вэхьше фашистгьоревоз, комигьореки бу ниет э муьрс дешенде инсонете ве омбаре бэхш хэлгъгьой имуре темиз-тихьор телеф сохде. Омбаре шолумлуье одомигьо пуч бирет э зир туфтуфон, э концентрационни лагергьо эри нисдигьо кор, тэхсирсуьз. Хиникире, гиснеире, хэребеире тоб дорет, синемиш сохдет имогьоине огьиле одомигьо, комигьо бу э у вэхд жовон, рач, зирек, оммо комигьо не дануьсдет не муьгьбет, не кифлет хуьшде, не бирет угьоре чуькле гIэилгьо, зу рафдет угьо эз зиндегуни, комире эри иму гьишдет. Э гирошдигьо салгьо бисдуьймуьн садсали одомигьой хэлгъгьой иму эз пес мундебугьо, энжэгъ хоригъуллугъсохэ вилеет ведировундет Уруссиете э хьисоб эз гьемме параменде, гъувотлуье хьуьуькуьметгьой гIуьлом. Суьфдеи одоми, рафдигьо э космос, бири одоми Совети Юрий Гагарин. Э вилеет вокурде омори садигьо тозе шегьергьо, гьозоргьо корхонегьо э жуьр-бе-жуьре сенигIэтгьо, комигьо гьер жире энтигъэе мэхьсуьлет ведешендет. Ире гьеммере сохдет имогьоине огьиле одомигьо, комигьоки гъимиш не сохдет не гъувот, не жовони хуьшдере, эри мозол доре э песошу оморенигьо эрхэгьой одомигьоре. Огьиле одомигьоре, комигьо веди биренуьт эз суьфдеи фегьм сохде, деруьт э гIэрей иму. Кими мэхьэл угьо биренуьт бонгъуз, лэгъэр, нечогъ, эз хуьшде хэсде, эз чуь хилос бире минкин нисди. Не мунди гъувот э пойгьо-десгьошу, кем бири дананигьо эн угьо, нисе варасиренуьт угьо кимигьо тозе коргьоре, чуьнки зиндегуни э е жиге нисе поисде, оммо и парамендлуье коргьо ни бисдо, ни доруьтге угьо эри эни бэхдевере дегишигьо жунсогъи хуьшдере. Угьо дорет тозе эрхэгьоре гъувотгьо ве товуше эгьуьлгьой хуьшдере ве бузуьрге метлебгьо, ниетгьо, войгегьой ишуре. Гьисдимге иму дуьруьсд, жобордлуь, муьхькем, бирейм эзечуь, чуьнки огьиле одомигьо дорет имуре и хосиете, и чигьрете, и гъирьете, метлебгьо ве имидгьой хуьшдере. Чуьтам миданим иму вогордуьнде у гъэдерсуьзе гъэрхундире? Энжэгъ веровундимге э гьэгъигъэти жовоне ниетгьой эн имогьоине эрхэй огьиле одомигьо суьгьде Ватан иму. Барасигьой иму гьисди эз гьемме хубте, мэгIэнолуье бэхш эри эрхэй мундигьо э зиндегуни огьиле одомигьо. Э ер бие биерим иму угьоре э вэхд гьер рузгьой мигIид, иму гьич ние фурмуш сохим игиде коргьой эн угьоре э рузгьой суруле довгIо ве э рузгьой бэхдевере шолуми. Иму бие э эвре сохим гьемме ишугълуье ниетгьой эн угьоре, кейки угьо бируьт жовон, жунсогъ, гъувотлуь. Огьиле одомигьо эз имуш зиед шори сохденуьт, мозоллуь войге сохденуьт хуьшдере эз гьер чуькле ве келе бараси кукгьой ве невегьой хуьшде. Эри эн угьо гьечуь оморени, гуйге угьо хуьшденишу расирет э у барасигьо. Имогьой гирошденге жовони, огьиле одомигьо нисе мунут гъэйгъусуьз, гисне, тешне, э тэхьнои, кумекисуьз. Угьо бие фурмуш сохут гиснеи ве тешнеире, косиби жовоне салгьой хуьшдере, кей угьоре не бири не хуне, не жигей эри форигъэти хуьшде. Угьо хуьшденишуш яратмиш сохдет и жиге ве и хуней хуьшдере ве бие войге сохут, ки гьисдуьт гъонунлуье сэхьибгьой зиндегуни. Иму бие хьуьрмет сохим угьоре эри зигьисде салгьо, эри жофохогье, хэеменди, эри зурбое муьгьбет эки жогьилгьо, эки гIэилгьо ве невегьой хуьшде. ТэгIрифлуьни э чумгьой ве дуьлгьой иму келете одомигьойму, гьемише, чуь не сохдимгеш, гъэрди иму э пушой эн угьо, игидгьой шолуми ве довгIо, зурбои. Согъбоши эри энугьо эз гьеммей дуьли ве нешумой иму!

Поделиться этой страницей