Эз хуьшде хубе нум гьишдегор

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Гьер инсон э дуьньегь зигьисде,
    Э нубот ю мирав эз хуше гIуьлом.
    Гъэрд одомини эз хуьшде хубе нуме гьишде,
    Гьемчуьн гьисди поке метлеб эн инсон.
    З.Семендуева.
    Руз бе руз зиед биренуьтгьо дегишигьой гьеймогьоине зиндегуни эдете нушу доренуьт, ки эри вероморенуьтгьо эрхэгьо егъин гереки дануьсдеи э товун ведилуье одомигьой хэлгъ иму, комигьоки дорет келе хьэрекетигьошуре эри параменд сохдеи гIилм, культурей, гIэдотгьой хэлгъ ишуре.
    Э гIэрей хэлгъ иму деруьт омбаре одомигьо, гIуьзетлуье коргьой комигьоки овурдет келе тэгIрифире эри ватан ве хэлгъ хуьшде. Э товун эн ужире одомигьо иму омбар нуьвуьсдебирим э нуботлуье верэгъгьой гозит иму. Оммо эки келе хьэйфбери воисдени нушу доре, ки нумгьой омбаре одомигьо комигьоки эшглуье тегьер фирегьу мэгIлуьм бу э гIэрей хэлгъ иму изму фурмуш бирет, энжэгъ мундет э ер кеме гъэдер одомигьо, енебуге куьнде гъовумгьошу. Имбуруз мере воисдени ихдилот сохде эри хундегоргьойму э товун мерэгълуье, хьуьрметлуье одоми хэлгъ иму, э товун комики мие дануь келете биренуьтгьо эрхэгьойму.

    Шинох биренге э салгьой гIуьмуьр Зарахия Абрамовоз комики 44 сал бэгъэй не зигьисди э и товуше гIуьлом, иму диреним, ки у гирошди гуфдире келе рэхь зиндегуни ологълуь гьисдигьо э мэгIэнолуье гъозией гъисмет гIэзизе хэлгъюревоз.

    Абрамов Зарахия Асаилович, комики хьэсуьл омори э 1901-муьн сал, э лап четине вэхдгьой хьуькуьмет иму, гьишди келе нишоне. Гьеле э жогьиле вэхд зиндегуни хуьшде э 1918-1919 муьн салгьо кор сохденбу чуьн хэтод эн Жугьурлуье миллетлуье комитет, комиреки рэхьберьети сохденбу Эсеф Пинхасов. Бэгъдовой э гуьнжо омореи э Дербенд хьуькуьм совети комитет жугьури бирени лов.
    Зарахия Асаилович эеки э Асаил Бинаевевоз ве Юно Семеновевоз эшгълуье бэхш вегирдебу э жэгIмиетлуье зиндегуни шегьер, э гуьнжо омореи суьфдеи догълуье-жугьурлуье театре э I920-муьн сал. У бу суьфдеи хьэрекети эри гуьрд сохдеи талантлуье творчески кор сохдебугьо жовонгьоре эз гIэрей жугьургьой догъи э драматически театральни десде. Увэхди норе оморебу э сегьне дуь пьесей эн Юно Семенов «Хитрая сваха» ве «Два старьевщика». Оммо эки хьэйфбери гереки гуфдире, ки гье э у сал драмкружок э Дербенд сэхд сохде оморебу. Увэхди Зарахия Абрамов, Юно Семенов ве чендигьойгеш гуьнжуьндебируьт агитколлектив, комики норебу чуькле пьеселегьо э тиже пуьрсуьшгьой увэхдине земоне гуьре. Партийни-советски рэхьбергьой Дербенд гъобул сохденуьт ижире тегьер творчески кор сохдеире ве доренуьт ихдиери эри э Дербенд гуьнжуьндеи драматически студией эн жугьургьой догъире. Э келе гIуьзетевоз гъобул сохде оморебу эз тараф томошесохдегоргьо барасигьой эн угьо.
    Эзуш бэгъэй Зарахия Асаилович бэхш вегирдебу эри гуьнжуьндеи суьфдеи гозит жугьургьой догъире «Зэхьметкеш», суьфдеи редактор, комики бу Асаил Бинаев.
    Э 1927-муьн сал Зарахия Асаилович бири пушолуье ве эшгълуье бэхшвегир эн вокурде оморебугьо фабрикей «Дагюн». Эз ихдилотгьой гъэдимие гьемватанигьойму ошгор сохде омори, ки э вэхд вокурдеи бинелуье корпус эн фабрике норе оморебу нуьгьрее сенгъ, э комики нуьвуьсде оморебу нумгьой эшгълуье вокурдегоргьой фабрике, э гIэрей комики дебу гьемчуьн нум Абрамов Зарахия Асаилович. Эз песи у бирени еки эз суьфдеи рэхьбергьой фабрик.
    Эз 1929-муьн те I932-муьн сал Зарахия Асаилович бирени бэхшвегир эн Президиум Дербентски горсовет ве прокурор шегьер. Э I935-I937-муьн салгьо – инструктор эн Догъистонлуье Центральни исполнительни комитет. З.А.Абрамов ченд гиле рэхьберьети сохди вожиблуье ве жогьобдорлуье жигегьоре, бири рэхьбер э буьлуьнде нумевоз.
    Гереки гуфдире, ки Зарахия Асаиловиче дебу неки хубе хьуьрмет э гIэрей корсохгьо, гьемчуьн э гIэрей жэгIмиетиш, комики эшгълуье бэхш вегирдебу э пуьруьшсохи э коргьой жэгIмиети эн хэлгъ иму.
    Оммо воисдени нушу доре, омбаре душменгьош бу З.Абрамове. Э I937-муьн сал, э вэхд бэхш вегирдеи э Жугьурлуье Миллетлуье комитет Зарахия Асаилович дуьстогъ сохде оморени ве дивун бурра оморени эри эну эри 10 салаи лагерни режим. Эз 23-муьн март 1938-муьн сал те 17-муьн март 1940-муьн сал у нуьшдени э гъэземет эн Ивдельски исправительни лагерь НКВД. Хилос сохдени уре дедей ю, Наами, комики дори гьеммей гъувот ве хьэрекетигьой хуьшдере эри субит сохде тэхсирсуьзи эн ферзенд хуьшдере. Эри эн ижире кор у рафдени э Москов вохурдени э М.Калининевоз, ве хилос сохдени кук хуьшдере эз ижире беде гъозие.
    Э март I940-муьн сал Зарахия Абрамов вогошдени э суьгьде шегьер хуьшде Дербенд.
    Вогошденге э хуне, З.А.Абрамов кор сохдени э колхоз э нум Каганович, эзумбэгъдоиге э жэгIкорхонегьой Дербенд.
    Сер гирденге Буьзуьрге довгIой Ватани Зарахия Абрамов э гIэрей омбаре ватанхогьигьо гьемватанигьойму рафдени э довгIо эри гъовхо берде э хунризе фашистгьоревоз.
    Э 1944-муьн сал З.А. Абрамов монухьо бирени эз гурунде ярагьой довгIои.
    Эловлуье ватанхогь ве дуьруьсде жофокеш Зарахия Асаилов эеки э Туьруьнж зен хуьшдеревоз тербие дорет пенж ферзендгьошуре Асаил (комики нори жун хуьшдере э гъэлхэнди серхьэдгьой гIэзизе ватан хуьшде. Нум эну изму вери э Книг еровурди, чуьн бэхшвегир Буьзуьрге довгIой Ватани), Пурим, Юрий, Соломон, Арон. Изму эз гIэилгьой Абрамовгьо зиндеи энжэгъ Пурим, комики зигьисдени э вилеет Исроил.
    Э эхир воисдени гуфдире келе согъбоши эз Соня Абрамова, гIэруьс эн Зарахия Абрамов, зен Соломон Зарахияевич, комики кумеки сохди эри дофус зереи э верэгъ гозит «Ватан» э товун гъэгъигъэтлуье ферзенд хэлгъ иму.
    Михаил Гаврилов

    01 Июля 2009

Поделиться этой страницей