Гьеммише э жергей пушолуьгьо

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Э товун ведилуье одомигьой хэлгъ иму, комигьоки ведировундет э гIуьзет чуькле хэлгъ имуре, иму омбар нуьвуьсдебирим э нуботлуье верэгъгьой гозит иму.
    Гьелбет, келете одомигьо омбар дануьсденуьт э товун энугьо, оммо эри дануьсдеи жовоне эрхэгьо, чуьжире барасигьо угьо овурдетге эри социальни-экономически параменди неки шегьер иму, гьемчуьн республикеймуш, иму эдее шинох сохденим э угьоревоз.
    Еки эз гIуьзетлуье корсохгьой эн колхозни гуьрдномегьо э 40-80-муьн салгьо, э товун комики изму мере воисдени ихдилот сохде, бу Азиз Хазанович Гильядов.
    Азиз Гилядов хьэсуьл омори 1-муьн май э 1912-муьн сал э дигь Джерах Республикей Догъисту, э кифлет косибе ранжбер. Э 1929-муьн сал варасде бэгъдо 7 класс хундеире э школе, э путевкей комсомол гуьре уре фуьрсоренуьт эри диеш зевер сохде дананигьой соводире э Московски землеустроительни техникум э нум Калинин. Э вэхд унжо хундеи э десдей однокурсникгьой хуьшдеревоз рафдени э Казахстан эри гуьнжуьндеи картгьой мескенгьоре эри эз песи вокурде колхозгьо ве совхозгьо.
    Э 1932-муьн сал, варасде техникуме уре фуьрсоренуьт э кор э геолого-разведочни бюро э шегьер Махачкала, эзумбэгъдоиге э отдел землеусторойствои эн Дагнаркомзем.
    Эз 1932 те 1934-муьн салгьо э теклифи обком партии гуьре Азиз Гилядов гировунди топографически коргьо э дорум ве софун Догъисту, гуьнжуьнди картгьо эри ошгорлуь сохдеи хушхоллуье жигегьоре эри вокурдеи колхозгьо ве совхозгьо.
    Э 1934-муьн сал А.Гилядов вихде оморени сернуьш управленией жилищни-кооперативни хьэрмэхьлугъи «Зэхьметкеш». Э рэхьберьети эну гуьре вокурде оморебируьт хунегьо э кучей э нум Ленин, 3-муьн Интернационал, Гагарин ве хуне экуьнди богъче э нум Киров.
    Эз вэхд 1936-муьн те 1944-муьн сал Азиз Хазанович кор сохди э е ченд жогьобдорлуье жигегьо: директор Бюро технически инвентаризациеи, рэхьбер Водкантрест, рэхьбер ремконторе ЖЭУ, сервор горкомхоз, гьемчуьн политрук эн Догъистонлуье Краснознаменни флотилие (1942-1943).
    Э май 1944-муьн сал – гуьнжуьндегор ве директор тозе вокурде оморебугьо совхоз э нум М.Дахадаев.
    Э июль 1946-муьн сал э гъэрор бюро Дербентски райком ВКП(б) уре норенуьт сернуьш эн колхоз э нум Каганович. Гереки гуфдире омбар четин бу эри эну инжо эри кор сохде, чуьнки бэгъдовой довгIо вес нисе сохдебу не одомигьо, не технике ве пес мундебу эз гьемме. Райком ВКП(б) телеб сохди, ки э кутэхьэ вэхд овурде эз гьемме песмундебугьо колхозе э гуьнжо. Эз сер суьфде Азиз Хазанович сер гирдени эри гуьнжуьнде дусдлуье коллектив. У сер гирд эри гешде-офде дуьруьсде ве номуслуье жофокешгьоре. Э вихде оморебугьо актив диреморенуьт синогълуье онгурбогъдоргьо: Исаев Мамри, Давыдова Гульбогьор, Ирмияев ЕшэгIие, Рафаилов Авнил, Новахов Авдалим, Абрамов Исай, Давыдов Мухоил ве диеш. Абрамов Соломон Захарьяевич бу хэтод комсомольски гуьрдномей колхоз. Сервор эн десдей зенуне, эжеки дебируьт Мазалту Исаева, Гъуьзуьргуьл Давыдова, Мазалту Рувинова, Тамара Юнаева, норе оморебу Гуьлбогьор Давыдова. Гьеммей эни одомигьо эеки э жовоне сернуьшевоз э келе эшгълуь ве келе жогьоблуьиревоз жофо кеширет ве ведиревунденуьт колзоз ишуре э еки пушолуьгьо, ве зиндегуни колхозникгьо расирени э хубе овхьолет. Э 1948-муьн сал колхоз расирени э келе барасигьо, э хотур комики веноре оморени э республикански тэхдей гIуьзети. Тэхуьл онгури увэхди расиребу экуьнди 300 центнергьо эз гектар. Эри э буьлуьнде гъэдер мэхьсуьлет онгури расире э артгьой 1948-муьн сал колхозникгьо вегирдебируьт хубе пулгьо.Чор звеньевой эни колхоз Гуьлбогьор Давыдова, Мамри Исаев, Исай Исаев ве Мардахай Исаев вегирдебируьт буьлуьнде нум Игид Жофои Социалисти, ве дуь колхозникгьоре бэхшире оморебу орден э нум Ленин.
    Бэгъдевой е ченд вэхд Азиз Хазанович гуьрд сохдени хоригьой эн колхозгьой э нум Ленин, Сталин, Каганович, Ворошилов э е совхоз э нум «Рэхь эки коммунизм». Хоригьой эни гуьрд биребугьо совхоз сер гирдебу э Араблинке ве варасдебу э дигьбон Догъистонлуье Огни. Э состав тозе совхоз дарафдебу дуь парандегьолуье фермегьо, дуь шир-моллуье фирмегьо ве корхонегьой шоробсохи, еки эз комики гьисди дербентски корхоней шоробсохи. Э базей совхоз «Рэхь эки коммунизм» гуьнжуьнде оморебу гIилмлуье производственни десде эз Догъистонлуье гIилмлуье-исследовательски институт хозяйствой хоригъуллугъсохи. Э Москов совхозе «Рэхь эки коммунизм» хуб дануьсдебируьт ве гIуьзет сохдебируьт. Унегуьре суьфдеи девилеетлуье делегациере эз Албание ве Болгария министерствой хозяйствой хоригъуллугъсохи СССР фуьрсоре оморени э Дербенд.
    Гереки гуфдире, ки кор сохде э келе дуьруьсди ве номуслуьиревоз Азиз Хазановиче гьеммише бири метлеб эри зиед сохде дананигьой соводи хуьшдере. Э 1963-муьн сал у хунде бегьем сохдени Догъистонлуье институт хоригъуллугъсохире.
    ГIуьзетлуье жофой Азиз Гилядович гъиметсуьз не мундебу. Эри э келе жобордиревоз кор сохде уре бэхшире оморебу буьлуьнде нум «ГIуьзетлуье онгурбогъдор РСФСР», «ГIуьзетлуье грамотегьо» эн Президиум Верховни Совет Догъисту, медаль «Эри оброной Кавказ», эри дуьруьсде жофои э вэхд Буьзуьрге довгIой Ватани ве е ченд юбилейни медальгьо.
    Оммо воисдени гуфдире, э гъэйгъукеши сернуьш дебу неки производственни коргьо, гьемчуьн эри эну мерэгълуь бируьт пуьрсуьшгьой жофои, соводи ве форигъэти колхозникгьо. Омбаре жовоне колхозникгьоре у фуьрсоребу эри хунде ве гъобул сохде зевери дананигьой соводире. Э войгей эну гуьре э 1955-муьн сал э Дербенд вокурде оморебу стадион э трибунегьоревоз эри томошесохдегоргьо эри 7 гьозор жигегьо (стадион «Урожай» э куче э нум Буйнакски). Эз песи стадион тозеден вокурде оморебу эри 10 гьозор жигегьо. Футбольни команде эн совхоз» Рэхь эки коммунизм» се гиле биребу чемпион эн меркезлуье совет эн добровольни спортивни общество «Урожай» РСФСР э возиреи футбол.
    Совхоз «Путь эки коммунизм» э рэхьберьети А.Х.Гильядов гуьре ченд гиле бири бэхшвегир эн бирмуннуьшигьой ВДНХ СССР.
    Э бирмуннуьшигьой ве барасигьой хуьшде совхоз се гиле бэхшире оморебу суьрхине медальгьо ве е медаль нуъгъреи ВДНХ СССР. Азиз Хазановиче дебу келе хьуьрмет э гIэрей могьлугъ ве район, у е ченд гиле вихде оморебу депутат эн шегьерлуье ве районни Совет депутатгьой хэлгъи ве бэхшвегир Пленум эн горком ве райком КПСС.
    В 1974-муьн сал А.Х. Гилядов рафдени э верзуьшлуье форигъэти хуьшде. Оммо э динжи, корсуьз нуьшде нисе дануьсде ижире дуьлтиже одоми, чуьн Азиз Хазанович, унегуьре гIэре не доре у гьегенеш рафдени эри кор сохде.
    Эз 1974-муьн те 1979-муьн сал А.Х. Гильядов кор сохди директор эн завод блокгьой дивори эн Главдогъистонстрой. Э 1978-муьн сал э овхьолет жунсогъи хуьшде гуьре А.Хазанович гирошдени эри кор сохде чуьн жигегир эн директор эн совхоз «Рэхь эки коммунизм» ве кор сохдени унжо те 1988-муьн сал те песини рузгьой зиндегуни хуьшде.
    Э эхир статья воисдени гуфдире, ки холисе ватанхогь А.Х.Гилядове дебу келе хьуьрмет неки э гIэрей корсохгьо, гьемчуьн э гIэрей кифлет хуьшдеш. Верзуьшлуье гIэилгьо эн верзуьшлуье бебе, чуьн Людмила Азизовна, Александр Азизович ве Вячеслав Азизович э дуьруьсдиревоз рафдет рэхь бебере ве овурдет гIуьзет ве хьуьрмет эри хэлгъ хуьшде.
    Гьелбет, иму боворлуьним, ки чендгъэдер эрхэгьош не гирошдуьтгеш, э ер гьемватанигьойму , хэлгъ иму, гIэилгьою гьеммише мидомунуь чуьн товуше едигори, нум гъэгъигъэтлуье ватанхогь ве дуьруьсде жофокеш Азиз Хазанович Гильядов.
    Мататова Мая
    Дагестанская республиканская газета "ВАТАН" на горско-еврейском языке

Поделиться этой страницей