Гъовхобергьой эн азади Ватан

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]


    ГIэзизгьойму эй буьзуьрге бесхуни
    Эз гIэтош пучиш бирет сере сер,
    Могьлугъгьойму кумек бирет эеки
    Эри мунде Ватан иму тевесер.
    Гьечи гьер сал дуьл дореним екире,
    Оморенге э сер гъоврей бирори.
    Жергегьойму лап туьнд эдете кем бире,
    ГIэжел жунгьо динж нисе гьишде эй гъэрди.
    А.Семендуев.

    Эдее томом бире 65 салгьо эри руз Буьзуьрге Бесгъуни, комики эшгълуье тегьер кори сохдени э зиндегуниму. Э пушорэхьи эни товушлуье мигIид воисдени эз дуьли-жуни егилейгеш э ер овурде ве гIуьзет сохде гьемме бэхшвегиргьой Буьзуьрге довгIой Ватанире, чуьнки э хотур жоборди ве игиди энугьо гуьре, комигьореки угьо бирмундет э вэхд хунлуье бесхугьо, эдете зигьисденуьт гьейсэгIэтине эрхэгьо.
    Сал-бе-сал эдете кем биренуьт жергегьой эн ветерангьой довгIои. Келе хьэйфбери кеширеним иму диренге ведарафдеи энугьоре эз жергегьой зиндегьо.
    Иму омбар нуьвуьсдейм э верэгъгьой гозит иму э товун гъовхобергьой Буьзуьрге довгIой Ватани. Оммо гъэрд имуни эри гьегенеш ихдилот сохде э товун игиде салгьой энугьо, комигьоки жун ишуре гъимиш не сохде муьхькем поисдет э гъэршуй дуьшменгьо, эн талавурлуье Германие.
    Гьелбет, эриму гIэмели нисд фурмуш сохде игидьети ве мердьети гIэзизе хэлефгьой хэлгъ имуре, комигьоки хун ишуре тигьи сохдет э довгIо э гъэршуй вэхьшие талавурчигьой фашисти.
    Унегуьре и пушогьо вохурде э хьуьрметлуье зен хэлгъ имуревоз Зоя Мататьяевна Беньягуеревоз ме тевэгъэ бисдоруьм эки эну эри ихдилот сохдеи э товун бироргьой хуьшде Ифраим ве Ягуда эри хундегоргьой гозит иму, ве дануьсдеи э товун эловлуье ватанхогьи энугьо келе биренуьтгьо жовоне эрхэгьойму.
    Насимов Ифраим Мататьяевич хьэсуьл омори э гъэдимие шегьер иму Дербенд э 1922-муьн сал э кифлет жофокеш. Эеки э Ругъо зен хуьшдеревоз, комики бири Деде-Игид, Мататья бебей Ифраим дорет гьемме хьэректигьошуре эри дошде ве веровунде 8 дуь э песой еки бире гIэилгьоре: Ифраим, Ягуда, Наами, Лева, Зоя, Лида, Истохор, Гуьлсуьрхэ. Э омбарегIэиллуье кифлет бебе-дедей хуьшде Ифраим бири келеи ферзенд. Хунде бегьем сохде 8 класс хундеире э школей №1 Ифраиме берденуьт э фронт.
    ГIэтош эн келе довгIоре
    Дегесундуьт фашистгьо,
    Билесумол хоригьоре
    Эй сохде эз хун инсонгьо.

    Рэхьберчигьой вилеети
    Вэхизундуьт э женг
    хэлгъгьоре.
    Вэхишд жоборд – хэлгъ Совети
    Дуьшмене жозе эри доре.
    22-муьн июнь1941-муьн сал, сэгIэт чорним себэхьмунде, гъушунгьой фашисти серхьэдгьой Ватан имуре пузмиш сохде, шишире диреморенге э сер вилеет иму
    Лов бисдо э согъ вилеет:
    Гофгьой гъовхо чуьн келе зенг:
    «Вэхьиз буьзуьрге вилеет,
    Вэхьиз э гъэзоблуье женг.
    Омбаре кукгьой Ватани
    Ерэгъэ э дес сэхд шишире,
    Недануьсд сегьм, четини
    Бирмунд келе игидире.
    Келеи бироргьой эн Зоере – Ифраим ве Ягударе келе имид ве ниет бу эри веноре гьемме хьэрекетигьошуре эри э дуьруьсдиревоз жофо кешире ве кумек бире э келе кифлет бебе-дедей хуьшде. Э и ниетгьой энугьо дегмиш бисдо сер гирде оморебугьо довгIо.
    Эри Ифраим Насимов довгIо сер гирде оморени гье э суьфдеи рузгьо, комики гъовхо бердени э серхьэдгьой Подмосковье. Десдей снайпергьо, муьхькем поисдембируьт э гъэлхэнди мескен ишу э гъэршуй томом согъэ ротей фашисти. Эеки э уревоз гъовхо бердебируьт кук дербенди Коля Ифтахов, Телхуьм эз Боку, омбаргьойгеш. Угьо неки э гIэрей эни вэхд тоб дорет э гъинормендиревоз э зир гужлуье, воруше хуно оморебугьо э сер энугьо гIэтош фашистгьо, оммо, тейте эришу кумек оморе дануьсдуьт нисд сохде омбаре гъэдер дуьшменгьоре. У вэхд э товун игиди гъовхобергьойму ве угьо вегирдетгьо трофейгьо омбар гуфдире ве нуьвуьсде оморебу.
    Хуб мунди э ер хэгьер, чуьтам бирор ю э десдин дес хуьшдеревоз телеф сохдебу 20 солдатгьой фашистире, ве эслогь екем мундебу эри дарафдеи э дес немцгьо, чуьнки эз веди бугьо штаб фашисти, шиновусде оморебу гофгьо э зугьун немци.
    Эри бирмундеи жоборди ве игидьетире Ифраим Насимове доре оморени е ченд медальгьо ве гIуьзетлуье грамотегьо. Оммо гьеле довгIо э пушо дебу, кейки э 1943-муьн сал гъобул сохде гурунде нечогьире эз шэхтелуье хиникигьо, Ифраиме э гIэрей е ченд ералуье солдатгьо фуьрсоренуьт э хуне.
    Дуьимуьн бирорме – Ягуда,- эдее э ер овурде Зоя,- гъовхо берди э гъэршуй фашистгьо э Грузие э догъгьой Гагры. Инжо гIэре не доре эдембируьт гирошде гурунде женггьо, комигьоки нисе доренбу дуьшмене эри рафде пушово. Ягуда эшгълуье бэхш вегирдебу э гьеммей эни женггьо. Оммо э еки эз гъизгъине гъовхогьо э гъэршуй дуьшмен рядовой Насимов бирени гурунд яралуь, гунилей фашисти расире э пой ю, у се руз эеки э командир частевоз мунденуьт э сер хинике хори. Гешденге угьоре, офд оморени муьрде командир, э ен комики ноле зере, эз пой гIэзиет кешире, дегешдебу ералуье солдат. Уре зури-зури эз хори вегирде, э носилкегьо деноре, берденуьт ве дегердунденуьт э госпиталь. Цхалтубо. Унжо у демундени 3 мегь. Екем хос сохде оморени ералуье пой. Э дуьл Ягуда Мататьяевич келе гъэгьр, келе гъэзоб дебу эри дуьшмен, эри женг берде э уревоз те песини гъувот, те песини нефес хуьшде, оммо э сереботи ералуье пой, гьелбет уре минкин небу. Виниренге хьол солдат эслогь гурунди гуфдире, эри бебе-дедей эну фуьрсоре оморени когъоз, егъин омореи ве бердеи эз госпиталь кук ишуре. Э 1943-муьн сал э дуь костыльгьоревоз Ягуда Насимов вогошдени э суьгьде шегьер Дербенд.
    Гьечуь гирошденуьт рэхьгьой довгIои дуь бироргьой Насимовгьо. Гьелбет угьо варасиренуьт чендгъэдер келеиге гъэгьр ве нехогьи энугьо эки хунризе бирэхьме талавурчигьо, чендгъэдер гьеле гъувот ве эшгъ герекиге, эри женг берде э суруле дуьшменгьоервоз. У бу гъувот эн руьхь энугьо, эн нечогъэ гъувотсуьзе одомигьо, ярагьой комигьоки шевиш-рузиш гIэре не доре эденбируьт жуьз зере. У бу гъуьвот руьхь солтатгьой Ватан Совети, диретгьо э чум хуьшдеревоз келе бедигьо, хэребеигьоре, овурдетгьо эри Ватан вэхьшие фашистгьо.
    Унегуьре э пушорэхьи Руз гъэлхэндчигьой Ватан имуре воисдени егилейгейш э ер овурде э товун энугьо, комигьоки гьемме эшгъ дуьл ишуре, гъувот жун ишуре дорет эри азади Ватан. Хосденим эри гьеммей гъовумгьо, гIэилгьо, невегьо-нишрегьой энугьо жунсогъи ве гьеммиише зигьисде э овхьолет шолуми ве ники.
    Мататова Мая Боруховна

Поделиться этой страницей