Гъуногъ редакциейму

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Гъуногъ редакциейму



    авторы:Мататова Мая Боруховна
    [IMG]Корсохгьой редакцией гозит «Ватан» омбар шор биренуьт, кейки дер редакциеймуре вокурде, экиму диреморенуьт гъуногъгьо-гьемватанигьойму, гьеймогьой зигьисденуьтгьо э де шегьергьойгей Уруссиет, енебуге э де вилеетгьойгей гIуьлом. Вогьней омореи энугьо омбардекиш ежиреют, чуьтамиге измуине овхьолет зиндегуни хэлгъ иму. Гьемчуьн вохурденуьт э гъовумгьо, хьэрмэхьгьошуревоз, ве егъин рафденуьт э сер бите-хьэимгьой эн куьнде одомигьошу. Лап сэхд кори сохде э дуьлгьойму у гъозие, кейки гъуногъгьо гуфдиренуьт согъбоши хуьшдере эри ведиремореи гозит хэлгъ иму э зугьун дедеи. Э келе эшгълуьиревоз угьо андуьрмиш сохденуьт, ки зигьисденуьтгеш дур эз гIэзизе ватан хуьшде, оммо гьич фурмуш нисе сохденуьт гъэдимие шегьер Дербенд хуьшдере, ве диеш шор биренуьт, дануьсде эз верэгъгьой гозит иму э товун мэгIлуьмлуье, мерэгълуье ферзендгьой хэлгъ иму. И пушогьо еки эз ужире гъуногъгьо бири гьемватаниму Леонид Иович Юшваев, комики ологъолуьни э редакциеймуревоз, чуьнки ченд салгьо кор сохди э и идоре. Измуш омбаре сиротгьой эну э товун мэгIлуьмлуье жофокешгьой шегьер иму, комигьореки синогълуье фотокорреспондент сирот зери, деруьт э фонд редакцией иму. Э ер мени ве измуш ме дошденуьм у сироте, кейки у оморе э школейму, сирот зери гIэилгьоре э вэхд гировундеиме э угьоревоз нубогьой дедеире. Унегуьре шор бире э вохурдеи э уревоз, мере воисд нуьвуьсде э товун эну. Леонид Юшваев эз деде хьэсуьл омори э 1974-муьн сал э шегьер Дербенд э кифлет жофокешгьо. Бебей эну Иов согъ гIуьмуьр хуьшде жофо кешири э шлифовальни станокгьо сохденигьо завод, чуьн токарь. Деде ю Маня кор сохди э миенее школей №19, чуьн секретарь. Маня ве Иов Юшваевгьо омбаре гъувот ве хьэрекетигьошуре дорет эри дошде ве тербие доре се гIэилгьошуре Стас, Леонид ве Владе. Гьер се ферзендгьой Юшваевгьо хундет ве тербие вегирдет э миенее школей №19. Хунде ве э барасиревоз варасде школере гIэилгьо рафдет дузе рэхь зиндегунишуре, вихде эришу эз дуьлишу биригьо сенигIэте. Келеи бирор Леонид – Стас хунде бегьем сохди авиационни институте э шегьер Кривой Рог, э факультет инженер-механик. Чуьклеи бирор Влад гьемчуьн бироргьойгей хуьшдеревоз муьхьшуьл бири э кор фотокорреспондент ве кор соди э сенигIэт хуьшде гуьре. Леонид Юшваев бэгъдевой школере варасдеи э 1991-муьн сал рафдени эри зиед сохде дананигьой соводи хуьшдере э шегьер Махачкале ве гъобул бирени э ДГУ э факультет журналистикеи, эжеки у хундени е сал, эзумбэгъдоиге дарафдени эри кор сохде э телевиденией шегьер Махачкале, чуьн кумекчи звукорежиссер, гьемчуьн те 1993-муьн сал кор сохди фотокорреспондент. Э 1993-муьн сал Леонид Юшваеве текелиф сохденуьт эри жофо кешире э республикански гозит эн хэлгъ иму «Ватан», чуьн фотокорреспондент. Дире жоборди, э дуьруьсдиревоз кор сохдеи энуре уре норенуьт жогьобдорлуье секретарь эн гозит. Э и идоре у кор сохди те 1997-муьн сал, Э 1997-муьн сал Леонид Юшваев эеки э Фирудин Эффендиевевоз вокурдебу телеканал Самуре. Те I999-муьн сал у кор сохди э унжо чуьн жигегир директор эн телеканал. Эжеки кор не сохдигеш Леонид Юшваев, у гьеммише бирмунди желдлуьи ве жогьобдорлуьи хуьшдере эки кор. Э 1999-муьн сал Леонид Юшваев э гъисмет хуьшде гуьре рафди эри зигьисде э вилеет Исроил. Изму ченд салгьо эеки э Марина зен хуьшдеревоз зигьисдени э шегьер Хадера. Изму уре гьисди хуьшденлуье студия, оммо те кор сохде э муьгьбетлуье сенгIэт хуьшде гуьре, Леонид Юшваев межбур бири эри жофо кешире э стройке, чуьн кафельщик, э охране, э завод, эжеки ведешенденуьт кондиционергьоре ве диеш. Э вэхд суьгьбет гировундеи иму Леонид Юшваев э келе эрклуьиревоз эденбу э ер овурде салгьой жофокеши хуьшдере э идорегьой шегьер иму, ве дусдгьо, хьэрмэхьгьой хуьшдере, э комигьоревозки уре бири муьгьлет эри жофо кешире, енебуге дусди берде. Ихдилот сохде э товун салгьой корисохи хуьшде э редакцией гозит иму «Ватан», у омбар шор бисдо, винире омбаре дегишигьоре э тараф хубе овхьолети эну. Э эхир суьгьбет иму Леонид Иович Юшваев гуфди келе разилугъи хуьшдере э товун тозе тегьер кор сохдеи гозит хэлгъиму ве хосд эри гьемме шолумхогье, гъуногъсевене гьемватанигьойму жунсогъи, гIуьмуьрдурази, э нике метлебгьошу расиреи. Имуш корсохгьой «Ватан» омбар шорим, ферзендгьой хэлгъ иму фурмуш нисе сохденуьт гIэзизе хоригьошу ве э муьгьбет ве эрклуьиревоз ихдилот сохденим э товун энугьо эри жовоне эрхэгьойму.

Поделиться этой страницей