Инсон ве гъисмет ю

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Гъисмет омбар муьхькемлуьни э зиндегуни инсон. Э пушой гъисмет едоне гъувот поисде, енебуге уре поюнде, дегиш сохде нисе дануьсде. Хуьшдени инсон нисе дануьсде, чуьжире дегишигьо мигироруьтге э зиндегунию, чуьнки гъисмет сурлуьни, пэхьнини эз инсон, оммо рэхьбери инсоне гъисмет сохде. Гьемчуьн гье эз гьочу игид эн нуьвуьсдеиме нисе дануьсденбу эз чуь сер гирде ве э чуьжире эхир миеруьге юре гъисмет.Исроил Ханухович Якубов хьэсуьл омори э 1938-муьн сал э гъэдимие шегьер-торихлуье Дербенд. Хьэнуьх бебешу тукончи эн горторг шегьер кор сохди. Михал дедешу э е жигеш кор не сохди сэхьиб хуне бири ве дошде тербие доре, веревунди чор гIэилгьой хуьшдере. Исроил э кифлет бири песини-чоримуьн гIэил.Э 1945-муьн сал хьофд сале, э хьэшди пой деноре, Исроиле сэхьибгьою норенуьт эри хунде э еки-муьн класс эн минжилуье школей №1 шегьер, эжеки Исроил Ханухович 8-классе варасде ве э гурунде хьол кифлет гуьре дарафдени э кор э идорей эн гьемхэлгълуье кургьо ве хундени э 9-муьн класс шевине школе.
    Э 1957-муьн сал Исроил Якубов огол зере оморени эри э солдати гъуллугъ сохде ве гъисмет бирени э серхьэд эн Молдавие э Румыниеревоз, чуьн серхьэдлуь (пограничник). Се салиге бэгъдо у эз солдати э войгей хуьшдеревоз фуьрсоре оморени э гъуромите хоригьо (на целину) чуьн кура сохдегор (сборщик) э вэхд бичин, эжеки у кор сохди эз март те декабрь 1960-муьн сал.
    [IMG]Э хуне вогошде бэгъдо э февраль 1961-муьн сал у дарафдени эри хунде э е салине курсгьой технически хундеи э филиал институт шегьер Калинин, эжеки шинох бирени э гъисмет зиндегуни хуьшдеревоз Валентине Егоровнеревоз, комики хунденбу э юревоз ве эз песи бирени зен ю.
    Е салине курсгьоре хунде варасдеки, Исроил Якубов э зеневоз оморенуьт э Дербенд ве дарафдени эри кор сохде э Бюро технически инвентаризациеи, эжеки кор сохдени те 1963-муьн сал.
    Э 1963-муьн сал Исроил Ханухович дарафдени эри хунде э Кемеровски хьуькуьметлуье педагогически институт э факультет торихи. Эз чор салиге, хундеире варасде бэгъдо, э 1967-муьн сал э август мегь э Дербенд вогошде бэгъдо кор сохдени чуьн заведующий эн очни-заочни школей рэхь гьовуни станцией Дербенд. Рэхьбери школере И.Якубов э келе хьэрекетиревоз берденбу, гьечуьки э гьер августовски совещаниегьо уре тэгIиф доре пуллуье бэхшгьо (премия) доренбируьт зеверие идорей соводи.
    Э 1984-муьн сал у текелиф сохде оморени э сельхозтехникум Дербенд, чуьн нубодорегор эн торихи ( история) ве обществоведение. Э 1990-муьн сал И.Якубов гъобул бирени э музей-заповедник чуьн заведующий эн гIилмлуье методически отдел, гьемчуьн э у коревоз кор сохди э школеш чуьн нубодорегор, гьемчуьн э театр тати шегьериш кор сохди чуьн актер те 2007-муьн сал, эжеки возири жире-бе-жире мэгIрифет-луье рольгьо. Эз 2007-муьн сал Исроил Ханухович э товун гурунде нечогъию, пенсионери.
    Э зен хуьшдеревоз Валентина Егоровнеревоз э еки угьо хьэсуьл овурде, дошде ве тербие доре веревундет чор гIэилгьо-шуре, комигьореки дануьсдет доре зеверие соводи. Изму гьемме гIэилгьой энугьо зигьисденуьт э е ченд шегьергьой вилеет иму-Уруссиет ве э Германие. Кук энугьо Владислав Якубов зигьисдени э шегьер Рязань, эжеки варасди юридически институте ве кор сохдени жигегир эн вице-губернатор шегьер Рязань.
    Изму Исроил не Валентине келебебей не келедедей эн пенж невегьоют. ГIэилгьошу э ферзендгьой хуьшдеревоз ологъолуьнуьт э сэхьибгьошуревоз – Исроил не Валентинеровоз.
    Эз нуминей гьеммей жэгIмиет иму ве эз редакцией республиклуье гозит «Ватан» хосденим эри Исроил Ханухович ве зен ю Валентина Егоровне жунсогъи, серсогъи ве гIуьмуьрдура-зи.

    Гаврилов Михаил
    Дагестанская республиканская газета "ВАТАН" на горско-еврейском языке

Поделиться этой страницей