Миг1ид бэхширеи Туро

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Э гIэдот егьудигьо гуьре 5-муьн сиван мэгIлуьмей мигIид Шавуот-ГIэселтеи. 6-муьн ве 7-муьн сиван рузгьой мигIиди. Имисал э луьвэхь урусси гуьре рузгьой мигIид ГIэселте офдоренуьт э 29-муьн ве30-муьн рузгьой мегь май.
    Шавуот хьисоб сохде оморени чуьн мигIид бэхширеи Туро, мигIид суьфдеине тозе бегьрегьо. Шавуот-ГIэселте чуьн мигIид хьофдгьо («шавуа»-оринеи, хьофд), гьечи огол зере оморени, ки гирде оморени э эхир хьофд оринегьо эз у вэхд, кейки чин (серп) э сер бичин веди бирени.
    Шавуот (ГIэселте) гьисди дуьимуьн буьлуьнде мигIид, бэгъдовой Песах (Нисону), э лугъонди гьозорсалигьо.Уре гьисди е нумигеш-пенжогь, ки мигIид офдорени э сер пенжогьимуьн руз эз Нисону.
    Э товун эни се мигIидгьо: Песах, Шавуот ве Суккот вери э пенж Хумош Миши. «Се гиле э сал ю мие биевт гьемме мердгьо э пушой Офирегор». Э гьечиревоз шиновусденим иму гофгьой Туроре э мигIид Шавуот: «Се гиле ги мигIиде эри ме э сал ю…».
    Э руз Шавуот Миши Рабину гъобул сохди э сер догъ Синай Гъонуне, э комики иму муьдим те имбурузиш. Туро ихдилот сохдени, кинимге иму ве вомухундени имуре тегьер зиндегуни, у хуте сохдени тефигъэти хубире эз беди.
    Э биней гьер дин дери боворин. Эри омбаре дингьо бинелуьни серзере э нишонегьо, комигьореки дин хьисоб сохдени гъэдуьши. Егьудигьо е вэхдиш сер не зерет э нишонегьо, угьо бовор сохдет э е теке Худо, оммо эри дин иму вожиблуьни неки энжэгъ боворин ве гирдеи гъонунгьой Туроре. Туро дорени инсоне эри рафде дузе ве нике рэхьэ.Туро - хьовир ве рэхьнорегор имуни э гьеммей рузгьой иму: эз хьэсуьл омореи те монухьо биреи. Туроре гуьнжуьнди Офирегор эри инсон.
    Э дегь гофгьой несигIэти деруьт бинегьой гьеммей чигьрет инсони, комисуьз гIэмел нисди зиндегуни эри е гъэймиш, эри е инсониш.
    Гъэдимие мэгIэси ихдилот сохдени, шев Шавуот асму вокурде оморени ве гьемме тефилогьо расиренуьт э Офирегор. Э Бет-Кнесетгьо хунде оморени посугъ эз Тиро э товун бэхширеи Туроре э догъ Синай э иму, гьемчуьн хунде оморени книг Мегилат Рут.
    Э мигIид Шавуот-ГIэселте иму хурденим хурек шири ве гIордире: пени, гъэймэгъ, суьзме, пертешгьой шири, ширине ловошгьо э гIэселевоз ве диеш. Гьисди ченд жире андуьрмиши эни гIэдот, еки эз угьо Туро эриму гьечи ширини ве войгелуьни, чуьн шир ве гIэсел.
    Гирде мигIид Шавуоте иму шор биреним э еклуьи Офирегор э инсоневоз. Офирегор дори инсоне раче гIуьлом, комиреки инсон мие доруь, э комики мие э хьитиетиревоз ве э эгъуьлевоз рэхьбери соху. Жофой инсон, гъурлугъ сохденигьо хорире, дорени бегьергьо, оммо Офирегор дори инсоне Тирош.
    Е гиле еки хэбер вегирд эз раби: «Эри чуь эхи иму огол зереним Шавуоте мигIид бэхширеи Туро?» «Чуьнки, жогьоб до раби – Тиро бэхшире омори э иму э руз Шавуот, оммо гъобул мие сохим уре гьер руз, гьеммише э зиндегуни иму!»

    Мататова Мая
    Дагестанская республиканская газета "ВАТАН" на горско-еврейском языке

Поделиться этой страницей