МигIид бэхширеи Туро

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    МигIид бэхширеи Туро

    [IMG]23-муьн Тишрей, бэгъдевой хьофд рузгьой гирошдеи мигIид Суккот, э луьвэхь егьуди гуьре сер гирде оморени шоре мигIид сали - Симхьо-Туро. Имбуруз э луьвэхь урусси гуьре дин-догIотлуье хэлгъ иму гирдени ижире шоре мигIид бэхширеи Офирегор хэлгъ имуре – Туроре. Гирде мигIиде, иму согъбоши гуфдиреним эз Офирегор эри гъиметсуьзе бэхш ве зиед сохдеи шорире, муьхькем биреи гIэрей иму э Офирегоревоз. Э Туро деруьт пенж жейлее книггьо, унегуьре гуфдире оморени пенж Хумош Туро. Эз у кор бэгъэй Туро жейлеи э 54 посугъгьо ве гьер шоббот э бет кенссетгьо (нумазгьоо) хунде оморени е посугъ. Песини посугъ гьисди эн Симхьо-Туро, ихдилот сохденигьо э товун песини рузгьой Миши Рабину. Офирегор буйругъ до Мишире эри вадарафде э догъ Нево, комики гьисди э хори Маови, э раче-бе-рачей гъэдимие шегьер Иерихон. Миши борухо сохд гъэйме ве варафд э сер догъ, ве вини Миши гьеммей хорире, э товун комики гуфдири Офирегор эз Оврогьом: «Вечегьойтуьре мидуьм и хори...». Екиш нисе дануьсде эже гъовре сохдеиге Миши. 30 рузгьо гирисди гъэйм эри рэхьбер хуьшде, эри буьзуьрге нови, сохди Офирегор руйберуй. Песини бэхш Туро томом биренуьт э гофгьоревоз: «Ве э муьгIуьжуьзгьоревоз ве буьзуьрге коргьоревоз, комигьореки бирмунди Миши э гъэйм Исроили...». Ве суьфдеи бэхш сер гирдени гьечи: «Эз гьевел офири Худо асму ве хорире». Гьисди гIэре э гъэд эхир ве сер ве и гIэре торих офиреини, берденигьо эз небиреи те битмиши ве торих гъэйм егьудии, берденигьо эз ошгори варасиреи Офирегоре те томомлуье говлеи Офирегор, комики гуьнжо овурди гьеммей гIуьломе, дуьньегье, гьемме э у гьисдигьоре, Оврогьоме, вокурдигьо эри ю э дуьл хуьшде боворин. 70 одомигьо дебируьт э кифлет Яагъу э у земонегьо, кейки у омо э Мисраим эки кук хуьшде Юсуьф. Кифлет чаруьсд э гъэйм ве умэхьэли Офирегор до гъэйме буьлуьнде бэхш - Турой хуьшдере, гъэйм чаруьсд э миллет! Туро генеш ихдилот сохдени эриму, кинимге иму, эз же омореймге, чуь чарундиге имуре э гъэйм, экиревоз Офирегор игърол бесдиге, чуьжире гъэрхундигьои э сер иму веруьтгьо ве чуьжире гъонунгьоре иму мие доримге. Ижире коргьо гьисдуьт омбар вожиблуь, комигьореки имуре ихдиер нисди эри фурмуш сохде. Унегуьре, э руз Симхьо-Туро варасде песини посугъ Туроре, иму сер гирденим сер юре, суьфдеи рузгьо, доригьо имуре Офирегор буьзуьрге Книг! Симхьо Туро лап дуьлшоре мигIиди, э гIэрей хэлгъ дебирени шори, муьгьбет, боворин э Офирегор хуьшде, гьеммееки хурде, хьэз сохденуьт э и мигIид. Гъэдимие мэгIэси гуфдирени, ки песини довгIой гIуьломи мибу иллогьки э мигиIд Суккот, довгIо «Гог ве Магог». Гуфдиренуьт, ки миев гьеммишелуьгие шолуми э хори ве новиети Иссая миев эжиге бэгъдевой эни довгIо, егIни «нивегируь хэлгъ хэнжел э сер хэлгъиге ве хуте ни соху дие гъовхо бердеи ве миев говлеи эри гъэйм Исроил. Э зугьун гIэреби, комики бу зугьун гофи э зомоней гаонгьо и руз огол зере оморенбу «Юм-Ат-Таврих-Руз Борухо». Симхьо-Туро лап дуьлшоре мигIиди. Э гIэрей хэлгъ дебирени шори, муьгьбет, боворин э Офирегор хуьшде. Э гьемме шоре мигIидгьо расошит, гIэзизе хундегоргьойму!

Поделиться этой страницей