Пуьруьшсохи инвестиционни план Республикей Догъисту

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Пуьруьшсохи инвестиционни план Республикей Догъисту

    [IMG]Э гирошдигьо орине э Республикей Догъисту э дуьрузине корлуье визитевоз оморебу жигегир Сернуьш Хьуькуьм РФ, Полномочни нушудорегор Президент РФ э Софун Кавказлуье округ Александр Хлопонин. Вохурде э Президент Республикей Догъистуревоз Магомедсалам Магомедовевоз, э Хьуькуьм РД гирошдебу гуьрдлеме э товун э кор венгесдеи инвестиционни план Республикей Догъистуре. Э корисохи эну бэхш вегирдебируьт жигегиргьой Полпред Президент РФ э СКФО Максим Быстров ве Юрий Олейников, Сернуьш Гуьрдлемей Хэлгъи РД Магомед-Султан Магомедов, Сернуьш Хьуькуьм РД Магомед Абдулаев, Госсекретарь РД Такибат Махмудова, Рэхьбер Администрацие Президент ве Хьуькуьм РД Гасан Идрисов, рэхьбергьой управлениегьой Президент РД, серворгьой министерствогьо ве ведомствогьо ве диеш. Вокурде гуьрдлемере, А. Хлопонин нушу до э товун омореи хуьшде э Республикей Догъисту эри пуьруьш сохде Стратегией социальни-экономически параменди СКФО, гьемчуьн Республикей Догъистуш. Пуьруьш сохде миев пуьрсуьшгьой нуьвуьсдеи могьлугъэ, суьгьбет гировунде миев э товун биевгьо вихдеигьо, гьемчуьн омореи э Дербенд, эжеки фегьм сохде миев параменди территорие. - Имбурузине гуьрдлеме вожиблуьни эриму - Стратегией социальни-экономически параменди Республикей Догъисту эри миеневэхдине ве дуразевэхдине перспективе, риз кеши А.Хлопонин. Чуьтам мэгIлуьм гьисдиге Сернуьш Хьуькуьм РФ Владимир Путин тогIин сохди Стратегией параменди Софун-Кавказлуье федеральни округе те 2025-муьн сал. Э Стратегие дери омбаре гъэдер тарафгьо ве приоритетни гъэрхундигьо, ологъолуь гьисдуьтгьо э пуьрсуьшгьой жигегьой кор дореи могьлугъэ. Гьисди фикир гуьнжуьндеи эки 2025-муьн сал 400 гьозор тозе корлуье жигегьо, зевер сохдеи темпгьой рост ВРП, расунде уре э гъэдер 7% зиедте э сал ю.У гьисди бинелуье биннуьши. Иму эдее параменд сохденим тозе производстворе, вокурденим тозе корхонегьоре. Э Республикей Догъисту эдее э кор венгесде оморе ФЦП «Юг Уруссиет». Мие дануьсде биев очугълуье расшифровкей объектгьоре, вокурде оморенуьтгьо э территорией республике. Имбуруз э мескен Догъисту эдее э кор венгесде оморе зиедие гъэдер Федеральни адресни инвестиционни программегьо. Гьемчуьн имуре гьисдуьт отраслеви ФЦП эз тараф соводи, гъэлхэнди жунсогъире дошдеи, транспорт, ологъи ве де профильни министерствогьо. Ужире программегьо имуре 35, ве угьоре гереки тигъэтлуь фегьм сохде. У гьисди согъэ блок пуьрсуьшгьо, комигьореки иму мие гирим э назари. Дуьимуьн бэхш гъэрхундиму, комиреки иму мие пуьруьш сохим - стратегией естественни монополиегьо. Чуьтам мэг1луьм гьисдиге, э территориегьой Догъисту кор сохденуьт ижире дуьруьжде компаниегьо, чуьн «Роснефть», «Лукойл», «Газпром», ве де дуьруьжде корпорациегьо, комигьореки имбуруз гьисдуьт стратегиегьой параменди хуьшде э территориегьой республикегьойму. Стратегиегьой эну монополие гьобул сохде оморет гьемчуьн те 2025-муьн сал. Гьер компаниере гьисдуьт инжо мерэгъгьо ве стратегиегьой хуьшде. У гьисди дуьимуьн вожиблуье тараф, эри комики мие доре биев тигъэт. Диеш лап вожиблуье бэхш, э сер комики иму мие кор сохим - гьисди кор э имущественни комплексевоз. Э имбурузине руз омбар вожиблуьни чуьжире проектгьо ве тарафгьо нушу доре оморенуьтге суьфденуботлуье гъэдер: индустрие молгьой вокурдеи, агропромышленни комплекс, сафари. Угьо гьисдуьт се нишонегьой экономике, комигьоки доренуьт келе эффект эз тараф гуьнжуьнде жигегьой корире. Оммо эз тараф налогови базе ве зевер биреи гъэзенжгьо э республикански бюджет, гьелбет, стратегически отрасль мие бу параменди топливни-энергетически комплекс. Э сер энижире кор мие омбар жофо кешире биев. Иму мие гьеммише зевер сохим хэйрлуье бэхш консолидированни бюджет РД, гьемчуьн иму мие параменд сохим се бинелуье секторгьой экономикере, комигьоки гуьнжуьнденуьт максимальни гъэдер корлуье жигегьоре. Изму гъобул сохде омори теклифи э товун докапитализациеи «Уруссиетлуье жирелуье экономически зоне» те 60 млрд. монетгьой эри инфраструктурни проектгьо, ологъолуь гьисдуьтгьо э параменди сафарлуье рекреационни зонегьоревоз. Гъирогъ дерьегь гьисди мескен, комики омбар мерэгълуьни эз тараф параменди курортни сафари. Дербенд гьисди буьзуьрге шегьер, комиреки гьисди буьлуьнде торихлуье, культурни потенциал. Гереки э гужлуье тегьер кор сохдеи эри параменди проектгьо. Гъобул сохде омори теклифи э товун гуьнжуьндеи банк парамендире. Изму гъобул сохде омори буйругъ дешендеи имисал э уставной капитал 500 млн. монетгьо э зиедие гъэдеревоз те гуьнжуьнде омореи проектгьо. Э гьеммей гIуьлом нушу доре оморени ижире модель, э комики гуьре параменд бирени экономике. Эдее гуьнжуьнде оморе корпорацией параменди, комики бэхш мивегинуь э ижире проект, гъимет комики эз 100 млн. те 5 млрд. Имбуруз гуьнжуьнде омори хубе овхьолет эз тараф стратегией параменди СКФО. Гьелбет, имуре омбари пуьруьш сохде не оморетгьо пуьрсуьшгьо э социальни сфере, э социальни инфраструктуре. Ве инжо гьово гирде оморени мейл Президент РД, э товун гуьнжуьндеи жирелуье ФЦП эз тараф параменди Республикей Догъисту. Гьелбет, келе гъэрхунди норе омори э пушой республике, оммо гереки гьемчуьн риз кешире э товун буьлуьнде потенциал эну. Догъисту мидануь бегьем сохде норе оморе гъэрхундигьоре, чуьнки уре гьисди хубе рэхьберьети э сервори Президент республикеревоз, э комики бовор сохденуьт Президент Уруссиет, Сернуьш Хьуькуьм РФ. Гьелбет, гьемме дануьсденуьт э товун нушу доре омореи четине овхьолет э республикейму эз тараф терроризм ве экстремизм. Унегуьре четини гуфдире э товун инвестициегьо ве гоф сохде э инвесторгьоревоз. Нушу доре э товун рушвохури ве бюрократие мибу гуфдире, ки пуьрсуьш энугьо фегьм сохд нисе оморе, чуьнки изму иму гуфдиреним э товун тозе рэхьбергьой республике, э пушой комигьоки норе омори де гъэрхунди - диревундеи капитале ве гуьнжуьндеи хуше овхьолет эри диремореи инвесторгьо. Эзумбэгъдоиге э гоф сохдеи хуьшде Президент РД М.Магомедов риз кеши, ки А.Хлопонин очугъ нори гъэрхундигьоре ве бирмунди, чуьтам угьоре герекиге пуьруьш сохде. - Иму мие очугъ ним э пушой иму план корисохимуре, чуьнки зиедие вэхд имуре нисди. Э гIэрей е мегь иму мие хьозур сохим план корисохимуре качественни ве зурие тегьер. Догъистуре иму мие виним лидер СКФО. У войгей иму нисди, у гьисди потенциал иму, э товун комики гьеммееки дануьсденуьт. У гьисди овхьолет географие, хубе минеральни сырьевой базе, гъэдер ве качествой жофолуье ресурсгьо, комигьоки нушу доренуьт минкинигьой барасилуье парамендире. Чуьтам мэгIлуьм гьисдиге, терсдиигьой экстремизм ве терроризм нисе доре имуре можол эри зевер сохдеи экономически гъэдер республикере. Тенденциегьой песини вэхд нушу дорени хубе овхьолете, могьлугъ дениширени э иму э оптимизмевоз. Иму эдее диреним, ки гъонундорлуье органгьо эдее де жире кор сохденуьт, ве эдее нушу доре оморенуьт хубе артгьой корисохи.энугьо. Имидлуьним, ки еклуье гъувотгьой гъонундорлуье блок, органгьой хьуькуьми ве жигелуье хуьшденрэхьберьети миеруьт эки эн ижире фегьмгири, ки потенциальни инвесторгьой иму мивинуьт Догъистуре чуьн сокитлуье олхоине регион, эжеки гIэмел миев параменд сохде бизнесе. Э песини 20 салгьо могьлугъ республике зевер бири эри 1,5 гиле, ве ижире тенденцие эдее дошде оморе. Унегуьре э зиед биреи могьлугъ гуьре гереки нушу доре объектгьой социальни инфраструктурере. Имуре вес нисе сохденуьт школегьо, больницегьо, идорегьой спорти, комики нушу доренуьт четинигьоре эз тараф корисохи э жовонгьоревоз, не биреи кор нисе доре можол эри вегирде хубе дананигьой соводире ве медицински гъуллугъигьоре. Ижире гъозие гьемчуьн нушу дорени боворинсуьзире эки хьуькуьм. Гьелбет, экстремистгьоре бирени можол эри гъэриш сохде муьвэхьгьой жовонгьоре ве огол зере, дешенде угьоре э талавурлуье десдегьой корисохишу. Унегуьре омбар вожиблуьни нушу доре инвестиционни политикере, комики мидуь муьгьлет эри ведиремореи эз ижире четини. Эри пуьруьшсохдеи ижире гъэрхундире э республикейму, гьемчуьн э согъэ округиш э кор венгесде омори комплексни Стратегие социальни - экономически параменди СКФО, комики хьозур ве гъобул сохде омори э рэхьберьети А.Г.Хлопониневоз. Приоритетгьой э инвестиционни политике гьевелинере хуноют. Угьо гьисдуьт промышленность, АПК, ТЭК, транспортни-логистически ве сафарлуье-рекреационни комплекс, комигьоки доренуьт имуре муьгьлет эри пуьруьш сохде дуь пуьрсуьше - зевер сохдеи налооблагаеми базере ве кор дореи могьлугъэ, фушенде гъэдер корсуьзире. Эффективни мидануь бире ижире тегьер, чуьн 70% нушу дореи гарантиегьо Минфин РФ эз тараф э кор венгесдеи э республике инвестиционни проектгьоре, комики гьисди эриму бинелуье пуьрсуьш. Имуре нисдуьт зиедие гъэдер парамендлуье финансови рынок, нисдуьт гужлуье банковски структурегьо, комигьоки мидануьсдуьт инвестирование сохде дуьруьжде проектгьоре. Оммо проектгьо нушу доре оморенуьт. Гьисдуьтгьо кемсуьгигьо нисе доренуьт имуре муьгьлет эри дировундеи инвесторгьоре эки эни проектгьо. Имуре гереки зиедие преференциегьой той сохде омоге э де регионгьогеревоз. Иму гъувотлуь мисохим инвестиционни блоке э Хьуькуьм иму, мивихим одомигьоре, жогьобдорлуь гьисдуьтгьоре эри гьер проект. Гуьнжуьнде омори Совет эки Президент РД эз тараф инвестициегьо, комики фегьм мисоху тиже пуьрсуьшгьоре, ологълуь гьисдуьтгьоре э диремореи инвестициегьо э республике. Гьемчуьн гуьнжуьнде миев Хорилуье инвестиционни фонд РД, чуьнки де девлетиге имуре нисди. Республикейму хьисоб сохде оморени кемехорилуь, оммо иму мигуьнжуьним у фонде, комики кумек мибу эри нушу дореи гарантиегьой гъэлхэнди капиталгьой потенциальни инвесторгьоре. Имидлуьним, ки гьеммейму эеки миданим дузе тегьер нушу доре экономически ве инвестиционни корисохире. Имбуруз имуре гьисдуьт хубе минкинигьо эри бирмунде э чуь иму божорелуьнимге ве чуь эз дес иму ведиреморениге.

Поделиться этой страницей