Рэхь данани ве соводи

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Миллет татиму лап девлетлуьни э одомигьоревоз, комигьоки е ченд салгьой зиндегуни хуьшде бэхширет эри кор сохде э сферай соводи. Бэхширенге эри шегуьрдгьо дананигьо ве талант хуьшдере, угьо доренуьт гъувотгьой хуьшдере эри у кор, ки одомигьо, вегирдетгьо тербиешуре бу гуфдире ведилуье одомигьо ве вегинуьт гуфдире эз дуьли биренигьо сенигIэт.
    Еки эз ужире одомигьо гьисди директор эн миенее школей №11 Захар Ильяевич Ильканаев. Корреспондент гозит «Ватан» вохурди э уревоз ве гировунди сугьбет.
    - Песини салгьо э школегьо доре оморенуьт Еклуье хьуькуьметлуье экзаменгьо. Чуьжире гьисдуьт ужире экзаменгьо, ве чуьжире ихдиеригьоре доренуьт шегуьрдгьоре?
    - Доре оморенигьо Еклуье хьуькуьметлуье экзамен (ЕГЭ) хьисоб сохде оморени чуьн нетиже, доренигьо эри дарафде э идорегьой зеверие соводи енебуге миенее специальни идорей экзаменсуьз. Э гъонун гуьре гьер шегуьрд мие дуь экзамен э ужире предметгьо, чуьн математике ве зугьун урусси. Эз ижире дуь предметгьо бэгъэй тербиевегирдегор мие вихуь предметгьоигеш, герек гьисдуьтгьо эри дарафде э идорей зеверие соводи. Ужире нуботгьой эн сенигIэтгьо ве предметгьо, комигьореки гереки вихде, деруьт э перечень, гъобул сохдигьо министр соводи РФ.
    Меселен, тербиевегирдегоре воисдени дарафде эри хунде э медицинлуье институт. Гьечуьниге, у мие вихуь ужире предметгьо, чуьн зугьун урусси, химие, биологие, физика. Изму э гъонун, эжеки нуьвуьсде омори тегьергьой экзаменацие, нуьвуьсде омори, ки эри гьер сенигIэт гереки доре экзаменгьоре се предметгьо, еки эз комигьоки гьисди профильни. Меселен, эри сенигIэт медицини профильни предмет гьисди химия.
    Бэгъдевой дореи экзаменгьоре шегуьрд мидануь эри сохде копияре эн нетижегьой ЕГЭ, берде угьоре эки нотариус эри норе нотариальни нуьвуьсдеи (нотариального заверения) ве фуьрсоре э жире-бе-жире вузгьой вилеет иму.
    Екем вэхд гирошде бэгъдо институт, эжеки фуьрсоре оморет документгьой эн тербиевегирдегоре, фуьрсорени жогьоб хуьшдере.
    - Не дануьсдге доре ЕГЭре э еки эз предметгьо?
    - Не дануьсдге доре экзамене э еки эз предметгьо, у мие доре биев дуьимуьн гиле экзамен гье э у сал. Не дануьсдге доре экзамене э дуь предметгьо, у мидануь доре экзамене егъин э биевгьо сал.
    - Кимигьо бирмунденуьт биразии хуьшдере эз гировунде оморенуьтгьо реформегьо, ологъолуь гьисдуьтгьо э ЕГЭ-ревоз. Дузи ми мейл эн угьо?
    - Ме хьисоб сохденуьм, ки мейл эн угьо дуз нисди. Кор уни, ки шегуьрд, э вэхд е ченд салгьой хундеи вегирденбуге дананигьоре, у мидануь дуз доре жогьобигьоре. ЕГЭ гьисди гье ужире экзамен, комики бу гьевелинере хуно. Дегишигьо, комигьоки гьисдуьт изму, доренуьт эри гIэилгьо эз косибе кифлетгьо бирмунде дананигьой хуьшдере эри дарафде пулсуьз эри хунде э идорегьой зеверие соводи.
    Инжо гьисди де пуьрсуьшиге. Кор уни, ки омбаре бэхш одомигьо, варасденуьтгьо миенее школегьоре, доренуьт омбар тигъэт хуьшдере эри дарафде э хьуькуьметлуье идорегьой зеверие соводи. Кор уни, ки дарафденге э хьуькуьметлуье идорей зеверие соводи, одоми нисе доре пулгьо эри дананигьо. Дарафдге э коммерчески вуз, гереки доре пуллуье гъимет эри соводи. Унегуьре омбаре бэхш могьлугъ вихдени хьуькуьметлуье идорегьой зеверие соводире.
    - Чуьжире войгегьоре ишму воисденит эри гуфдире эри гIэилгьо, варасденуьтгьо школей №11?
    - Ме хосденуьм эри угьо хубе нетижегьоре э ЕГЭ, дарафде э идорегьой зеверие соводи, вегирде хубе дананигьоре ве вегирде эз дуьли гьисдигьо сенигIэт.
    Марк Осипов
    Дагестанская республиканская газета "ВАТАН" на горско-еврейском языке

Поделиться этой страницей