Рэхьбер чуькле десдей сазендегьо

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Хосиет мугъум бирмундени э иму лугъонд нешумой миллете, гIошире руьхь эн уре. Унегуьре мугъумчигьо иллогьки гIуьзетлуьни э гIэрей хэлгъ. Тербиедорегор хэлгълуье мугъум Лидия Осипова кор сохдени э педколледж Дербенд имогьой экуьнди 35 сал. У хьэсуьл омори э кифлет сервор шегьерлуье газови корхоне, комики имогьой, эки хьэйф, не дери э гIэрей хэлгъ иму. Дедей ю Мария Шамаевна экуьнди 50 сал кор сохди э везифегьой тербиедорегор хьисоб сохдеи э школагьой шегьер, гьейсэгIэт ведиромори э верзуьшлуье пенсия, кори ю имогьой э невегьоровои. Лидия Осипова э барасиревоз варасди мугъумлуье училище э Махачкале, песде тербие вегирди э мугъумлуье-педагогически факультет э Дагестански педагогически институт, имогьой биригьо хьуькуьметлуье университет. Омбаре салгьо кор сохдени у гьемчуьн э везифегьой рэхьбер чуькле десдей сазендегьо (камерный хор), комики яратмиш бири э гужигьой эн уревоз еки эз суьфдеигьо э улкей иму. Унегуьре нум Лидия Александровна хуб ве фирегь мэгIлуьми э гIэрей мугъумчигьо неки шегьер иму, оммо гьемчуьн э республикеш. Активни бэхш вегирдени коллектив чуькле десдей сазендегьо эн Дербентски педагогически колледж э рэхьбери ве келе хьэрекетигьой Лидия Александровна э республикански дениширегьо-конкурсгьо, э мигIидой шегьер иму, эже гьемише вегирдени буьлуьнде оценке дивун. Э салгьой кор сохдеи хуьшде десдей сазендегьо хунди э пушой мэгIэнолуье хьисоб дениширегор жуьр-бежуьре мэгIнигьой э зугьун уруси, зугьунгьой хэлгъгьой Догъисту ве девилеетигегьо э фирегье репертуар направлениегьо эз полифонически те джазови. Эри гуьлишонлуье ве селигъэлуье корсохи Лидия Осипова вегирди знак «Отличник хэлгълуье соводдореи Уруссиет», нум «Келеи тербиедорегор», гIуьзетлуье грамоте эз Хьуькуьметлуье Меслихьэт Республикей Догъисту, э 2003-муьн сал уре доре омори нум вегирлуье корсох минжее пишелуье соводи РФ, э 2005-муьн сал – нум верзуьшлуье корсох базургенди РД. Лидия Александровна гьисди тербиедорегор келете категория ве уре гьемчуьн доре омори нум «Ветеран жофо». Эз гьемме мэгIэнолуье артгьой корсохи эн Л.А.Осипова гьисди, чуьтам у хуьшдени хьисоб сохдениге эри хуьшде гIилмлуье – исследовательски кор ве бэхш вегирдеи э гIилмлуье мугъумлуье конференциегьо. ГьейсэгIэтиш у жофо кеширени э сер темагьо «Корсохдеи мугъум э жунсогъи ве нешумой одоми», «Э кор вегирдеи мугъумлуье – компьютерни технологиегьо э нуботгьой мугъум». Лидия Александровна гьисди вомухундегор жогьиле корсохгьо, э комигьоки сохдени методически кумеки эз гьеммей темизе ве фирегье нешумой хуьшде э гировундеи нуботгьо ве идоре сохдеи внеклассни кор, мейл гирдени ологъигьо э гьевелине выпускникгьой хуьшдеревоз, мерэгълуь бирени э барасигьой корсохдеи эн угьоревоз э зиндегуни. Лидия Александровнере гьисди духдер Ирина, комики варасди э барасиревоз Санкт-Петербургски университет буруние экономически ологъигьо э девилеетигегьоревоз, кор сохдени э сенигIэт хуьшде э дуьруьжде хуневокурденигьо корхоне. Уре эдее келе биренуьт дуь кук – Владислав ве Михаэль, комигьоки э гоф келедеде денишире, лап хосденуьт мугъуме. Келеи Владислав имогьой рач возире э фортепиано. Лидия Александровна гуфдирени фикиргьой хуьшдере, ки тербиедорегоре мугъум гьисди иллогькие мэгIэно, чуьнки угьо берденуьт э гIэрей хэлгъ базургенди ве буьлуьнде руьхь. Педагогически колледж Дербенд дорени школагьоре омбаре хубе тербиедорегоргьо миллетлуье ве гIуьломлуье мугъум, доре тигъэт э гIуьломлуье гъэдотгьой мугъумвозиреи.
    Фотогалерея[IMG]



Поделиться этой страницей