Синогълуье сенигIэткор

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Синогълуье сенигIэткор



    авторы:Мататова Мая Боруховна
    [IMG]Гъэдимие шегьер иму Дербенд буьзуьрги э торих ве гIуьзетлуье жофой жофокешгьой хуьшдеревоз. Э гIэрей хэлгъ имуш деруьт ужире одомигьо, комигьореки хуб дануьсденуьт ве э товун энугьо э келе хьуьрметевоз гуфдиренуьт. Имбурузине ихдилот ме э товун одомини, комики муьгьбетлуьни э вихде оморигьо сенигIэт хуьшде. Меш уре чуьн жофодусде одоми шинохденуьм, унегуьре и пушогьо вохурде э уревоз мере воисд нуьвуьсде э нуботлуье верэгъ гозит иму э товун рэхь жофокеши ве зиндегуни эну. Ася Годовна Хизгияева эз деде хьэсуьл омори 31-муьн октябрь э 1958-муьн сал э кифлет жофокеш. Бебей эну Год ченд салгьо кор сохди э корхонегьой шоробсохи, бири проводник ве эеки э Дора зен хьшдеревоз дорет гьемме муьгьбет ве гъувот хуьшдере эри тербие доре ве расунде э метлебгьой дуьл ишу чор гIэилгьоре. Вероморе э овхьолет дусди ве шолуми, гIэилгьо зу дануьсдет гъэдуьр жофоире. Изму дуь келеи хэгьергьой Ася – Мазалту ве Аня зигьисденуьт э кифлетгьошуревоз э вилеет Исроил. Гьемчуьн чуьклеи бирор энуш Владимир э дедей ве кифлет хуьшдеревоз зигьисдени э Исроил. Э шолумлуье кифлет хуьшде Ася бири сеимуьн ферзенд бебе-дедей хуьшде. Омбар мерэгълуь ве зиреклуь бире эки хундеи, Ася э келе хьэвесевоз муьхшуьл бири эри вегирде дананигьой соводире ве бири еки эз пушолуье тербиевегирдегоргьой миенее идорей соводи, школей №15. Э вэхд хундеи Ася бэхш вегирди э гьемме мероприятиегьо, комигьоки гирошдебируьт э школе. Э 1978-муьн сал эри диеш зиед сохде дананигьой соводи хуьшдере Ася рафдени э шегьер Орджоникидзе, ве гъобул бирени э техникум рэхь гьовуни э экономически факультет. Бэгъдовой чор сал хундеи э и соводлуье идоре ве э барасиревоз бегьем сохдеи уре, Ася вогошдени э гIэзизе ватан хуьшде. Эз сер 1983-муьн сал Ася Годовна, суьфдеи гиле диреморе э дервозей коньячни корхоне, ологъолуь сохдени гъисмет хуьшдере и э корхонеревоз. Эз у рузевоз сер гирде оморени рэхь жофои жовоне духдер, чуьн бухгалтер эн материальни отдел. Гьелбет, эри кор сохде асант не бу, чуьнки жовоне сенигIэткор миесд дануьсде фендгьой сенигIэт хуьшдере. Омбар дуьлтиже одоми бире у гьеммише дануьсди гьертарафлуь э гуьнжо овурде кор хуьшдере. Э омбаремиллетлуье десдей корхоней коньяксохи, эжеки гьеммише нушу доребу овхьолет дусди ве шолуми Ася Хизгияева э дуьруьсде жофой хуьшдеревоз ве э мигьровуне дуьл хуьшдеревоз дануьсди гъобул сохде муьгьбет ве гIуьзет э гIэрей корсохгьой корхоне. Э 1999-муьн сал Ася Хизгияева э гъисмет хуьшде гуьре э кифлет хуьшдеревоз рафдени эри зигьисде э Исроил. Оммо э 2005-муьн сал вогошдени э гIэзизе ватан хуьшде ве генеш э теклифи рэхьбергьой коньячни корхонеревоз оморени э инжо эри кор сохде. Дире божорени ве дуьлтижи юре э вэхд корисохи уре гировунденуьт э расчетни отдел бухгалтерии эн корхоней коньяксохи эз тараф бинелуье средствогьо. Ася Годовна доре эри кор келе жуьргIэт ве гъувот хуьшдере, э данани ве синогъи хуьшде гуьре, дануьсди коре дуз ве сербегьем овурде. Э гIэрей эни омбаре салгьо кор сохдеи хуьшде Ася Хизгияева келе хьуьрмет гъэзенж сохди э дуьруьсде жофой хуьшдеревоз. Рэхьбергьо ве корсохгьой эн Ася омбар разинуьт эз дуьруьсде жофокеш. Гьемчуьн дери уре хьуьрмет э гIэрей гьемватанигьой хуьшдеш. У гьисди еки эз ужире туьлтиже одомигьо, комигьоки е дэгъдэгъэш корсуьз нуьшде нисе дануьсде. У гьисди бинелуье чигьрет эн хосиет эну, чуьн коре э гуьнжо овурде дануьсденигьо сенигIэткор. Оммо лап келе верзирение бэхш эну гьисди хьуьрмет ве гIуьзет э гIэрей хэлгъ ве уре шинохдегоре одомигьо, гьемчуьн э гIэрей ферзендгьой хуьшдеш. Эеки э Хизгия шуьвер хуьшдеревоз, комики ченд салгьо кор сохди чуьн бенновокурдегор, дошди веровундет дуь бэхдевере хэлефгьоре: Роберт ве Ефиме, комигьоки хунденуьт э ДГУэ юридически факультет. Омбаре ниетгьой кифлет Хизгияевгьо оморет э жиге. Эри расире э келе ниетгьой хуьшде, гереки эз войге бэгъэй келе боворин ве муьгьбет. Э и зуригьо э эхир мегь октябрь Ася Годовна Хизгияева мигировунуь руз хьэсуьл омореи хуьшдере. Имуш эз нуминей редакция эдее хосденим эри эну жунсогъи, дуьлдинжи эн гIэилгьошу биреи, шори, ники энугьоре виниреи.

Поделиться этой страницей