Суккот – шоре мигIид поизини

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Гьер сал э вэхд поиз э 15-муьн Тишрей сер гирде оморени шоре мигIид дин-догIотлуье хэлгъ иму - Суккот. Имисал э луьвэхь урусси гуьре мэгIлуьмей мигIид офдори э 23-муьн сентябрь. Суккот гировунде оморени хьофд рузгьо эз 15-муьн те 22-муьн Тишрей. Э луьвэхь урусси гуьре мигIид гировунде оморени эз 23-муьн те 30-муьн сентябрь, комики томом бирени э Шмини Ацерес. МигIид Суккот хьисоби еки эз се бинелуье мигIидгьо, комигьоки веруьт э Пенж Хумош Туро. Э Туро гуфдире омори: «Гу э ферзендгьой Исроили, ки э15-муьн руз 7-муьн мегь Тишрей мигIид Суккоти, суьфдеи руз гъэдуьше гуьрдномеи, гьич гурунде кор месохит. Э суккегьо зигьит хьофд рузгьо эри эрхэгьойму дануьсдеи, ки ведебердем ферзендгьой исроилире эз хоригьой Мисраим». Э еровурди эз дор-дурох сохде оморе хунелегьо, э коминжоки зигьисдет э гъэдимие девргьо бебегьо-келебебегьойму э вэхд оворе биреишу э сэхьрегьо мунди гIэдот гьер сал вокурдеи суккегьоре (шалаши) экуьнди хунегьошу ве нуьшде хьофд рузгьо э унжо. Гереки гуфдире, ки де мэгIэноигеш гьисди э хотур комики иму гировунденим и шоре мигIиде. Э Туро нуьвуьсде омори гьемчуьн: «Ги гьемчуьн мигIид вечиреи суьфдеи бегьергьой жофой туьре, комигьореки туь кошдей э хори, ве мигIид вечиреи бегьергьоре э эхир сал...». И мигIид нушу доре оморебу э гIуьзет зими дурундеи, тэхуьл, бегьер вечиреи мигIид хэлгъи ве ранжбери. Согъэ сал ранжбергьо жофо кеширет э хоригьошу, темиз сохдет угьоре эз сенгъгьо, бил зерет, кошдет тэхуьле, буррат ве бесдет шивгьой онгуре, шендет дермугьоре эри нисд сохде ологъгьоре ве жуьлзегьоре. Лап гъизгъине рузгьой гьеминон, кейки эри поисде кор сохде э зир гIэтоше эвир гIэмел нисе биребу, егьудигьо мисохдуьт эз луьгегьо ве дор-дурох суккелегьо ве пэхьни мибисдоруьт э унжо эз гIэтошлуье ригазгьой чуьшме. Вэхд богъчиреи сер мигирдге, богъбонгьоре минкин нисе биренбу эри э тегьнимиревоз форигъэти вегирдеи, чуьнки не бу угьоре вэгIдо эри вогошдеи шев э хуне, хисире э герекие тегьеревоз. Гье э гъэд богъ богъбонгьо норебируьт суккегьоре ве хисиренбируьт э унжо. Пушой себэхь лап зу сери, те чуьшме ведиремореи, угьо гье генеш сер мигирдуьт эри кор сохде. У салгьо, кейки ранжбергьо вечирет гIошире мэхьсуьлете, бирет эри энугьо шоре мозоллуье салгьо. Омбаре жофош доре оморебуге эри вечиреи мэхьсуьлете енебуге бегьергьоре, оммо берекетиш омбар биренбу ранжбергьо ве богъбонгьоре. Э Худой хуьшде шуькуьр сохде тевэгъэ ве минет сохдебируьт эри дореи ишуре берекет. Изму э гIэдот гуьре нуьшдеи э Суккот э хунелегьо э эз дор-дурох сохде оморетгьо, дорени имуре минкини эри варасиреи, чуь гъувотлуь, желдлуь, гьинорлуь бируьтге гъэдимие одомигьой хэлгъ иму. Угьо гьич не терсирет эз четинигьо, гьеммише гъовхо бердет э гъэршуй секонеигьо. Офирегор кумек бири э одомигьо ве пэхьни сохди угьоре э зир гъэнет хуьшде. Имбурузине эрхэгьо эдете э шори ве дуьлхоширевоз гировунденуьт хьофд рузгьой Суккоте Воисдени генеш э ер овурде кими гIэдотгьой мигIиде, кей ве чуьтам герекиге вокурде суккере. Бэгъдевой Йом-Кипур гирошдеи, гереки вихде раче, темизе жигере, эжеки нисдуьт сэхде кулокгьо. Бун суккере веноре оморени э дор -дуроховоз, оммо эз тиракгьой бун эну мие веди бу астарагьо. Гьундуьри сукке мие бу эз хьэшдод см.те 1 метр.ним, эз 60 см.те чендгъэдер воисдгеш. ГIэмел нисе оморе вокурде суккере э зир луьгелуье дор, чуьнки гереки гуж веноре э хуьшде, хьозуре тегьер нэгI. Вараюнде оморени сукке э хунчегьой суьмбуьлевоз, хушегьой онгуревоз, гъэребечгьо-фундугъгьоревоз э ченд жире емишгьо ве гуьлгьоревоз. Э гъонун мигIид гуьре э сукке гереки хисире шев э асму ведиреморенге астарагьо, бэгъдевой тефило хундеи э нумазгьо, гереки диреморе э сукке, борухо сохде ве гуфдире: «Нуьшит э сукке!». Э Сукот э нумазгьо хунде оморенуьт тефилогьо, э вэхд комики э дес гирдеи оморени луьгей хилмовлуье пальмеи, дуь луьгей иве, се луьгей мирт ве этрог- цитрусови бегьер, ухшеш зеренигьо э дуьруьжде лимон. МэгIэной этрог гьисди - хундеи Туроре ве сохде никилуье коргьо, Хилмов -хундеи Туроре, оммо зиедие рэхьмедуьлишуре нисе бирмунденуьтгьо одомигьо. Мирт э дуьруьсдиревоз зигьисденуьтгьо, оммо нисе хунденуьтгьо посугъгьой Туроре. Ива - у одомигьо комигьоки дуруьт эз Туро ве зиндегунишуре гIэмел миев гуфдире чуьн нишонлуь, оммо угьо дешенде оморет э хунчей жугьури, чуьнки угьосуьз хунчере гIэмел ниев гуфдире пурлуь эхирлуь. Мозоллуьни у инсон, комиреки хош оморе ве дануьсдени шор бире эз кешире жофой хуьшде. Ижиреи мэгIэно эн мигIид Суккот. Эдее тевэгъэ биреним эки жэгIмиет иму эри бире эшгълуье бэхшвегир мигIид Суккот. Эз гьеммей дуьли-жуни эдее омбаракбу сохденим ишмуре э мигIидевоз ве хосденим эришму жунсогъи ве э барасигьой жофои расиреи. Берекет биево эришму ве шор гердо дуьлгьошму, гIэзизе дусдгьо!
    Фотогалерея[IMG]



Поделиться этой страницей