Томоше э гIуьзет мигIидгьо

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Томоше э гIуьзет мигIидгьо

    [IMG]Театр – гузги эн хэлгъ юни. Театр гирдени еки эз герекие жигей культурей хэлгъире. У тегьер гузги бирмундени э хэлгъ хуьшде кемсуьгигьо ве барасигьой энуре. Э гьеймогьоине овхьолет зиндегуни лап гурунди гьер коре э жиге овурде ве эзуш бэгъэй эзу кор дуьлхоши вегирде. Оммо дуьлхоши овурдеи эри омбаре одомигьо, эри согъэ жэгIмет гьисди зиедие бараси кори. Гьелбетт, хубе гъозие гъэдер бири э зиндегуни могьлугъ шегьер иму Дербенд у кор, ки и пушогьо, э гIуьзет жерге мигIидгьой хэлгъ иму: Рош-а шана, Сукот, Йом-Кипур, Симхьо-Туро муниципальни театр тати нушу дори эри томошесохдегоргьо спектакль эз нувуьсде оморигьо пьесей М.Дадашев «Дургуне гIэдот». Пушой сер гирдеи спектакль жергей артистгьо: Хазан Гилядов, Эммануил Нисимов, Динара Султанова, Джамиля Аскерова ведиреморе э пушой сегьне, ихдилот сохдет эри томошесохдегоргьо э товун мэгIэной эни мигIидгьо. Вокурде оморени пердей эн сегьней театр. Сегьне варавунде оморебу э гъэдимие тегьер зигьисдеи, чуьнки веди бу эз гъобгьо-гъужобгьо ве ранге-бе-рангие тегьер геймиш сохде утогъ хунере. Гьемме гъозиегьой эн пьеса «Дургуне гIэдот» эдее гирошденуьт э минжи 20- муьн девр. Гьеммишеинере хуно эдее гирошденуьт бэхьсгьо, суьгьбетгьо э гIэрей келе ве чуькле эрхэгьо э сереботи гъэножогъигьой одоми эки корисохи ве спекуляциеи эки дузи ве дургуни. Э сюжет эн пьеса гуьре эз гьемме келеи персонажгьо, комигьоки гирденуьт бинелуье жигере Мирвори ве Эликсендир. Угьоре гьисди духдер Марал ве кук Мунош. Гьемчуьн зиедие тигъэт томошесохдегоргьоре нушу дорени Равоши, персонаж, комики ошгор сохдени кемсуьгигьой эн гьер вэхде, чуьн дуьзди. рушвохури, келегеди ве диеш. Э хьэвесевоз возирегоргьо э гьемей гъувот ишу гуьре венорет хьэрекетигьой ишуре эри хош омореи томошесохдегоргьоре эз спектакль. Омбар шор бирет одомигьо, оморетгьо эри фегьм сохде спектакле, комигьоки дануьсденуьт ве екем семе варасиренуьт зугьун деде-бебей хуьшдере. Келе пешмуни кеширембируьт ве нисе варасиренбируьт гуфдиреигьой артистгьоре одомигьо, комигьоки нисе дануьсденуьт зугьун дедеире. Э келе чек-чек зереиревоз томошесохдегоргьо гъобул сохдебируьт возиреигьой эн Верзуьшлуье корсох культури Догъистуре Мозол Израиловаре, рэхьбер эн театре ГIуьзетлуье корсох искусствои Догъистуре Лев Манахимове, Ксения Магомедоваре, Элина ве Михаил Фараджевгьоре, Любовь Исаковаре. Диеш воисдени риз кешире, зиедие тигъэт доре оморебу эки возиреи энижире жовоне артистгьо чуьн Хазан Гильядов ве Олег Михайлов, комигьоки э келе муьгьбет ве хьэвесевоз дорет хьэрекетигьой хуьшдере эри эз дуьли возире э спектакль. Омбар шор бируьт томошесохдегоргьо эз шиновусде оморебугьо мэгIни «Раче гуьлгьо», комиреки э раче сесевоз хундебу Рагиля Омарова, ве мэгIни «Анахну», комиреки хундебу э зугьун иврити жовоне артистке Динара Султанова. Гьемчуьн э спектакль бэхш вегирдет музыкальни рэхьбер Аврелия Нисимова ве гировундегор эни томошере Джамиля Аскерова. Бэгъдевой варасдеи спектакль томошесохдегоргьо гьеле хэйли мэхьэл дуь э екиревоз пуьруьш сохдебируьт спектакле ве возиреи артистгьоре, ве хосдет эри энугьо жунсогъи ве э диеш буьлуьнде барасигьо расиреи. Имуш, ки хосденим эри гьеммей артистгьо творчески барасигьо ве диеш зиед биреи жергегьой жовонгьо эри омореи ве возиреи э сегьней театр хэлгъ иму. Бирмунде хьуьрмете эки гьер артист, эки вози ю буьрж имуни. Унегуьре э вэхд, кейки доре оморени томоше мие гьеммей жэгIмет бурав эри денишире спектакле, чуьнки эри хьозур сохде ве бирмунде уре, артистгьо дорет омбаре хьэрекетигьо ве вэхд ишуре. Мая Борухова.
    Фотогалерея[IMG]



Поделиться этой страницей