Товуши хуней дананигьо

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Товуши хуней дананигьо


    [IMG]
    Гьисдуьт э гIуьлом омбаре сенигIэтгьо, корисохи комигьоки овурденуьт эри одоми хьуьрмет ве гIуьзете. Оммо эз гьемме гIуьзетлуь ве хьуьрметлуьни сенигIэт нубодорегор. Учитель! И гьер рузине гофе иму шиновусденим ве гуфдиреним эз гIэилиревоз. Мибу гуфдире, ки келе ниет омбаргьо бу учитель бире, енебуге э муьгьбетлуье учитель хуьшде ухшеше зере Оммо омбар фикир дореним иму, чуь мэгIэно дериге э и гоф «учитель»? Гьэгъэ нубодорегоре, тербиедорегоре мие бу хубе дананигьо, гьемчуьн у мие дануь дананигьоре э кор хуьшде гировунде, очугъ сохде мерэгълуьи эн гьер жирей хундеире эри пушо ю нуьшде нубовегирдегоргьо. Гьемчуьн нубодорегор-тербиедорегор мие бирмунуь келе муьгьбет хуьшдере эки гIэилгьо, комики егъин мие дебу э дуьл холисе тербиедорегор. Энжэгъ э ужире тегьеревоз у мидануь рэхь берде гьер жире классе, бэхшире угьоре хубе жирегьой хосиет ве тербие доре угьоре э нефес имбурузине руз гуьре.Э товун омбаре нубодорегоргьой шегьер иму нуьвуьсде оморебу э верэгъгьой гозит иму «Ватан». Гьемчуьн иму гьеммишелугъ дофус зереним э товун тербиедорегоргьой хэлгъ иму, ишугълуье талант ве лугъонде дананигьой комигьоки овурдет эри энугьо келе хьуьрмет ве гIуьзете. Э хотур номуслуье корисохи хуьшде ве дореи хубе дананигьо ве тербие нубохунгьоре доре омори е ченд гIуьзетлуье грамотегьо, нумгьой «Верзуьшлуье учитель РД», «ГIуьзетлуье корсох соводи», бэхшгьо ве грантгьо ижире тербиедорегоргьоре, чуьн Зинаида Шимиевна Акиваева, Мария Григорьевна Изьяева, Мина Петровна Бахшиева, Раиса Петровна Бахшиева, Лидия Шамаиловна Мардахаева, Софья Яхьяевна Абрамова, Галина Михайловна Пинхасова, Хивит Пейсаховна Атнилова, Яфа Шамаевна Бахшиева, Анжела Даниловна Манаширова, Ольга Рамбомовна Ягудаева, Галина Ароновна Юханановна ве омбаргьойгереш. Э товун тербиедоргоргьо сер гирденге гофсохдеи э ер ме оморенуьт нумгьой нубодорегоргьой сш.№1 эз куьгьне земоне гуфдиренимгьо, оммо э нефес тозе вэхдевоз зигьисдебируьтгьо ве кор сохдебируьтгьо учительгьо, комигьоки кумек бирет э ме э гIэрей эни 30 салгьо кор сохдеиме. Э вэхд сад салине зиедте торих эни гъэдимие идорей хундеи омбаре салгьо жофо кеширет буьлуьнде дананигьо бирегоре учительгьо. Эз 40 салгьо зиедте гIуьмуьр хуьшдере бэхшири эри тербиедореи гIэилгьоре Пинхасов Юшва Ирмияевич. Лап келе хьуьрмет дебу э шегьер иму синогълуье тербиедорегор эн математикеи Марья Нисимовна Нисимовнаре. Угьо келе сохдет ве дананигьо дорет ченд ве ченд эрхэгьой тербиедорегоргьоре. Эки келе хьэйфбери воисдени гуфдире, ки угьо ченд салгьо не деруьт э гIэрей хэлгъ иму. Э руз мигIид учительгьо воисдени э ер овурде мэгIлуьмлуье ве синогълуье тербиедорегоргьоре, чуьн Беньямин Данилович Беньяминов, тербиедорегор биологиеире ве завуч организатор эни школере, Софья Михайловна Давыдова, нубодорегор физикеи, Суьгьлуь Бенсионовна Акиваева, учитель математикеи, Людмила Михайловна Шамилева, учитель биологиеи, Ада Азиевна Хаимоваре, нубодорегор дерсгьой музыкеи, Роза Садыковна Садыкова, учитель суьфдеи классгьоре, гьемчуьн учитель зугьун дедеи, Раиса Михайловна Юханановаре, нубодорегор суьфдеи классгьо ве чендигьойгереш. Шуморде ве гирде нумгьой эн гьемме синогълуье, верзуьшлуье тербиедорегоргьой эни школере, гьелбетт, минкин нисди. Имбуруз угьо зигьисденуьт э де шегьергьойгей вилеет иму, гьемчуьн э Исроилиш. Оммо егъин гереки гирде нумгьой эну корсохгьоре, комигьоки изму эз гьемме дуьли-жуни хуьшде эдете доренуьт эшгъ дуьл ве гъувот хуьшдере эри веровунде верзирение эрхэй тербиевегирдегоргьоре. Имбурузиш э и школе э нефес имбурузине вэхдевоз эдете жофо кешире синогълуье сенигIэткор, ГIуьзетлуье корсох соводи Раиса Петровна Бахшиева, гьемчуьн варасдегор эни школе жовоне тербиедорегор математикеи, бэхшвегир эн гьеммей коргьой школеи Ольга Абрамовна Аврумова. Хосденим эри гьеммей энугьо жунсогъи ве виниреи ники гIэилгьошуре. Имбуруз соводи гьисди еки эз бинелуье хьуькуьметлуье приоритетгьо. Эдее вокурде оморе тозе школегьо, тозеден бирени материальни-технически базе, эдее э кор венгесде оморенуьт, инновационни технологиегьо, гуьнжуьнде оморенуьт гьемме коргьо эри нушу дореи качественни соводире. Эз сер суьфде э учителевоз ологъолуьнуьт имидгьо эри гьер тарафлуь параменд сохдеи личность нубодорегоре, эри гуьнжуьндеи толерантни гъэножогъигьо эки де миллетгьоиге. Гьеймогьоине школере герекуьт тербиедорегоргьо, комигьореки гьисди буьлуьнде дананигьой соводи, буьлуьнде культуре, школере гереки учитель-творец, учитель-исследователь. Изму зиедие тигъэт доре оморени эри эшгъ ве кумек дореи талантлуье учительгьоре. Зиедие стимул эни кор биренуьт грантгьо, доре оморенуьтгьо буьлуьнде сенигIэткоргьоре эз нуминей министр соводи ве Президент республикей Догъисту, хьозур сохденуьтгьо бэхшвегиргьой гьемуруссиетлуье конференция «Шаг в будущее». Изму э келе шори ве эрклуьиревоз воисдени нушу доре э товун буьлуьнде барасигьой Хивит Пейсаховна Атнилова, нубодорегор химиеи сш №8. Э Гъэрор министерствой соводи ве гIилми Уруссиет эз 1-муьн июль 2008-муьн сал эз нуминей министр соводи РФ А. Фурсенко, Хивит Пейсаховна гъобул сохди ГIуьзетлуье грамотере, э комики гуьре нушу доре оморени чуьн бэхшвегир конкурс эз семе хубе учительгьой Федерацией Уруссиет. Э эхир эни статья э гIуьзет ГIэрейхэлгъ-луье мигIид учительгьо воисдени эз дуьли гуфдире келе согьбошии эри гьемме тербиедорегоргьой вилеет иму эри хубе дананигьо дореи энугьо гIэилгьоре, комигьоки рафдет дузе рэхь зиндегунире эри хэйрлуь бире э гIэрей одомигьо.

Поделиться этой страницей