Усдой рачи партал

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Гьер инсон, комини э дуьньегь зигьисде, Э нубот ю мирав эзи хуше гIуьлом. Гъэрд одомини эз хуьшде хубе нуме гьишде, Гьемчуьн гьисди поке метлеб эн инсон. Зоя Семендуева. Божэхьэти офд миев одоми э гъэдимие шегьер Дербенд иму, комики нисе шинохдебу омбар жофодусде одомире, синогълуье парталдухэ Довид Довидове. Гьелбет, зэхьмет инсон, жофою э вэхд зиндегуни – хьуьрмет не гIуьзет юни. Эз гIэилиревоз, мунде бебесуьз, у зу дануьсди гъэдуьр жофоире. Довид Ирмияевич эз I4 саларевоз сер гирди эри рафде рэхь жофои хуьшдере. У гьеммише э келе эрклуьиревоз э ер овурдебу суьфдеи тербиедорегор хуьшдере, келе усдой дерзиетире Ева Томчинскире, комики бирмунди эри эну дузе рэхь жофокешире ве хуте сохди уре э усдоети дерзи. Гирошдет вэхдгьо.Довид Ирмияевич Довидов - синогълуье усдо-парталбуррагор (закройщик) хуте сохди э сенигIэт хуьшде 100 зиедте шегуьрдгьоре, э гIэрей энугьо гьемчуьн 3 хэлефгьой хуьшдереш, комигьоки изму кор сохденуьт э вилеет иму ве э Исроилиш, ве мэгIлуьмлуьнуьт, чуьн ведилуье усдогьой кор хуьшде. Э вэхд корисохи хуьшде э сферей гъуллугъ могьлугъэ веровундеи Д.Довидов гъэзенмиш сохди келе хьуьрмет ве гIуьзете э гIэрей хэлгъ ве корсохгьой хуьшде.
    Э апрель 1990-муьн сал эри дуьруьсде жофокеши Довид Довидове доре омори буьлуьнде нум «ГIуьзетлуье корсох эн бытовой обслуживания». Э 2003-муьн сал Довид Довидов э гъисмет хуьшде гуьре рафдени э Исроил, ве зигьисдени э шегьер Бетелезер те песини рузгьой зиндегуни хуьшде. Одомигьо, комигьоки хуб шинохдебируьт уре, гьич вэхд фурмуш ни сохут дуьлшоре, хьэвеслуье, мэгIрифетлуье хосиет усдой парталдухире. Довид Ирмияевич Довидове. Эри гьеммишелугъи мимунуь э ер гIэилгьо ю, гъовумгьо, хьэрмэхьгьо ю, чигьрет эну, чуьн келе одомихогь, гьэгъигъэте дусд, боворинлуье хьовир. Монухьо ю э генгIидим гъисмет гердо. Изму э теклифи омбаре хундегоргьой гозит иму гуьре эдее нуьвуьсденим статьей Михаил Гаврилове «Усдой рачи партал», комики дофус зере оморебу э альманах тати «Ватан Советиму» э 1979-муьн сал. Жофо инсоне рач сохде. Е сал бу шуьвер ю муьрде, Ливгъо дер кабинет председатель колхозе вокурденге. Эз лэгъэре, сиегье чердее сифет и жовоне зен веди бу, чуьтам гурунде фикиргьо дегиш сохденге чигьрет энуре. Ливгъо эрзоре э сер стол председатель норе, гуфдирени: - Бэхшлемиш сохит, мере член колхоз ишму бире воисде. Э тигъэтевоз эрзоре хунде, председатель сере тик гуьрде, гуфдирени: - Биреш гереки. Шуьвер ишму омбор пушолуье жофокеш бу. Жигей эн ужире мерде энжэгъ гьинорменде инсон миёгируь. У э зени мерди кор не вери... Гье и себэхьине правление тевэгъэшмуре э сер бегьем миёрим. - Омбор согъбошит,- гуфдире Ливгъо ведироморени эз кабинет. - Инсон биё гьинормендире соху. Чуь мидануьм сохде ме – зен хэйлогъи? И фикиргьо динж ние гьишденбу Ливгъоре. У нисе дануьсденбу, мидануьге ю у ихьдиборире э жиге овурде. - ...Миё гьеммей гъувот мере венуьм эри пес не мунде. Ливгъо хурег, рузи, гIэилгьоре хьозур сохде, зу-сери мирафд э кор. Хунегьо ве дуь чуькле гIэил мимунд э сер дегь сала, келеи духдер – Гегей. Ебойге торики шохьонгум эз кор вогошде, Ливгъо эз дерд дуьл ве эз хэсдеи минуьшд э гуьм-гуьми. ГIэилгьо могъбули дедере дире, минуьшдуьт э ён ю. Эз гьемме чуьклете бугьо, е сала Довид, дедере гъэл гирде тимор мисохд сифет юре. Эз чорченги, тозеле э пой вэхуьшдебугьо Довид денишире, Ливгъо мигуфди: - Имогьой гьемме имидгьой ме ишмунит. Туьни чуьшмей себэхьине руз ме. - Куьнде хэгьер-бирор гурунде хьол Ливгъоре дире, гьерки ежире рэхь миноруьт э пушой ю. Екигьо мигуфди, доре-восдоре сох, екигьойге рэхь мэгIмеле дореире э пушой ю норе мигуфдируьт: - Эз Зулпо не Хумор и ченд салгьо э мэгIмелеревоз дуланмиш биренуьтгьо, туь кеми бегем?! - Кем нисдуьм! НэгI! Оммо той эн угьо биреш нисе воисде мере. Ме миё эри гIэилгьой ме дузе рэхь зиндегунире бирмунуьм, огьили ме хошбэхд бу. Оммо ишму...
    Рузгьо мегьгьоре дегиш сохде, гирошденуьт салгьош. Песово мунденуьт гиснее салгьо, ве эри Ватан Совети гурунде 1941-1945 салгьой довгIоиш. Шаздегь сала Довид гурунде зэхьмет дедере дире, нисе дануьсде, чуьтам кумеки сохуге э у. Оммо и е рузе, коминире Довид гьич фурмуш ни соху, келе дегишигьо овурде э зиндегуни ю. Е руз шоббот, шохьонгум, зен гъунши, Ева Григорьевна эз кор вогошденге, Ливгъо уре огол зере, гуфдирени: - Жон Ева, гьери виниш эз и мол эри Довид шовол миверовге. Э сер стол е тике сиегь-сипре зуле мол вебу. Ева Григорьевна э пеймунегьой Довид гуьре эз сер мол гировундени сипре ризгьо э мелевоз. Моле бурра, гуфдирени; - Me мидухум... Ишмуре можол нибу... Тигъэтлуь э дес дерзи дениширебугьо Довид, Ева Григорьевна вадарафденге, мундени омбар фикирлуь. Мугуиге эз гьемме ю дире усдоети Ева Григорьевна, энжэгъ е жигелере не варасире мунди мэхьтел. Дуьимуьн руз Ева Григорьевна духде хьозуре шоволе дировунде, гуфдирени эз Довид: - Гьери воку виним... Довид шоволе э дес вегирде гьер тарафлуь фегьм сохде, духдени юре. - Чуьни, хьэз нисе оморе туьре? - НэгI! Омбар согъбошит. Хуби. Энжэгъ... - Чуь энжэгъ?! Довид э хуне дарафде ведировундени э тегьер пожогьой шовол бурра когъозгьо. Э дерзи бирмунде, пуьрсирени. - Игьоре э еки чуьтам вогосунде? Ева Григорьевна э Довид денишире, лов ю э хэнде варафде. - Туьре дерзи бире воисде? Довид жогьобсуьз сергъуз поисде, эз зир сиегье фирегье гъошгьо дениширени э деде. - Ихдиёр мидориге, Ливгъо, мибердуьм Довиде э шегуьрди. Э дерзихонейму гьейсэгIэт эдете шегуьрдгьо вегирденуьт. Бигьил, сенигIэт хуте бу эри хуьшде гIэил.
    Гьевели рузгьо десгьой Довид эз герме ути сухде ве энгуьшдгьой десгьой ю эз дерзе сула-сула биренге, уре воисденбу дес вегируь эз и «бирэхьме сенигIэт». Оммо юре гIэйб мисохут гуфдире тоб доренбу э энгуьшд дерзе варафде, дес ю эз ути сухде, дуз не духде жигере е ченд гиле векенде дуьборе духдере ве де четине коргьойгереш. Екиге гофгьой Ева Григорьевна: «Дерзи миё сабурлуь бу», омбар сокит сохденбу битоби юре. Е сал бэгъдойге, Довид дуьимуьн разряд вегирде гирошдени э усдоети. Довид, э хьэрекетлуье жофо кеширей ю гуьре, варафдени дуь разряд зевер. Имогьой Довид ю шегуьрд хуте сохде, мигуфди: - Тоб ди. Дерзи миё сабурлуь бу. Э 1950-муьн сал, Довиде рэхь сохденуьт э солдати. Э солдатиш Довид э партал солдати духденигьо дерзихоне кор сохде. Е ченд хубе усдогьоре фуьрсоренге э курсгьо, эри дананменди сенигIэте зиёд сохде, э гIэрей эн угьо дебирени Довидиш. Хундеире варасде бэгъдо, уре норенуьт бригадир партал комсостав (офицергьо) духденигьо дерзихоне. Э 1952-муьн сал Довиде гъобул сохденуьт э кандидати партией коммунисти. Е салиге бэгъдо, у дарафдени э жергей коммунистгьо. Эз солдати оморенге Довид вогошдени э сенигIэт хуте биригьо дерзихоней хуьшде. Е ченд мегьгьо кор сохде бэгъдо уре фуьрсоренуьт э Московский школей дерзиети. Омбар хьэрекетлуь корсохдеи ве хуьшдере обурлуь, э инсон лоигъи, бердеи ю гуьре, хьуьрмет Довид варафдени руз-бе-руз зевер. Данандеи хуьшдере пэхьни не сохде, у гьемише э хьэрмэхь кумеки мисохд. Не уреш гIэйб ни омо эри не варасиреи хуьшдере хэбер вегирде. У кор хуьшдере тигъэтлуь сохде мигуфди: - СенигIэт инсон миё эз дуьли ю бу. Заказчикгьо гьем хуб, гьемиге рач, духде партале гъобул сохде эз луьгъонди дуьл келе согъбоши мигуфдируьт эз Довид. Э зеверсер Довид корсохденбугьо мошин варафдени секуьнже чуькле гъирмизине бейдогъ «Пушолуье жофокеш». Э усдоети ве данандеи ю гуьре, Довиде гировунденуьт э закройщики (партал буррагор) э артель «Дружба» шегьер Дербенд. Довид дануьсдени э ю суке кор тапшуьрмиш не биреире. Э у боворини дуз ве ихьдиборлуь эри ведироморе, у жофо кешире, э сер гьер усдо, гуьнжуьндени жовоне бригада. Бригада э сер хуьшде вегирдени гьер тарафлуь рази сохдени заказчикгьой ишуре. Довид хьэрекет сохдени эри мол кем рафденигьо тозе модельгьо гуьнжуьнде. Хонендее усдо сабурлуь жофо кешире расирени э метлеб. У гуьнжуьндени дуь метро палтуй зенуне ве е чендигеш мол кем хэрж биренигьо тозе модельгьо. Эз Довид гуьнжуьнде модельгьо, эри Догъисту ве у республикегьойге лоигъи гъобул сохде оморе хьофд модель. Е ченд гиле Довид духде парталгьо воноре оморет э выставке э шегьергьой Дербенд, Махачкала, Ростов. Довид эри хубе селэгъэлуье кор хуьшде ченд гилегьо лоигълуье премиегьо ве бэхшгьо гъобул сохди. Изму хьовир Довидов заочно эдей варасде Московский техникум закройщик модельерире. Цех, Довид серберэхьи сохденигьо лоигълуь вегирди гIуьзетлуье нум жофекешгьой вилеет имуре «цех жофой коммунисти». - Me эз лугъонди дуьл ме келе согъбоши гуфдиренуьм эз у зен, мере э и сенигIэт хуте сохдигьо. Ве согъ гIуьмуьр гъэрдхундуьм буьзуьрге партией Ватан советимуре. Уни имуре э дузе рэхь зиндегуни норе, пушово берденигьо. Me гьеммей гъувот мере мидуьм эри пес не мунде эз у, себэхьине, бэхдевере девр, пушолуье одомигьой Ватан иму. Me диеш хубте хьэрекет мисохум эри э хуб ве рач духде парталевоз рази сохде заказчикгьоймуре. У э дес иму дери. Дерзини – усдой рачи партал. Изму Ливгъош э Довид денишире гуфдирени: - Э зэхьметгьой ме верзирей, хэлефме. Огьили ме хошбэхди.
    26 Июля 2009

Поделиться этой страницей