ХОЛИСЕ ШОГЬИР

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    ХОЛИСЕ ШОГЬИР

    [IMG]Ки э улкей иму нисе дануьсде нум хэлгълуье нуьвуьсдегор Догъисту Хьизгъил Авшалумове, комики эки хьэйфбери не дери дие э гIэрей хэлгъ иму. Оммо имогьой эдее келе бире Хьизгъил Авшалумов – чуьклеи, комики гьемчуьн, нединишире э жогьиле салгьо, нуьвуьсдени бегьеме стихигьо ве ведешенди суьфдеи книг хуьшдере э нумевоз «Екимуьн книг». Гофчуьн бебей юш Нисон Гилядов бири ведилуье журналист ве шогьир, омбаре салгьо кор сохди э радиой тати, оммо вэхдсуьз рафди эз зиндегуни. Чуькле Хьизгъил лап хуб, зирек дирени гьемме, чуь бирениге, гирошдениге э иловлей ю. Гьелбет, у гьелем гIэили, оммо омбаре фикиргьой эн у, чуь вединиге эз суьфдеи книг ю, гьисди гуйге эн келе одоми, омбар диригьо э зиндегуни хуьшде, э гIуьлом ве дануьсденигьо эз гирошде салгьой хуьшде. Меселен, у гуфдирени лап эз дуьли э товун секонесуьзи дивэгI бирмундеи сохдени эри азади дореи вэхьше хьэйвугьоре. Е хэйли хунденим иму э стихигьой Хьизгъил э товун оюгьо, туьлкигьо, гуьргьо, хэрегушгьо ве диеш, гьемме мерэгълуь э товун зиндегуни, комики гирошдени э мерге више, эз комики уре лап хьэз оморе. Кими мэхьэл иму диреним э офурум жовоне шогьир ижире коргьо, комики нисе биренуьт э эвре. Меселен, э мигIид Тозе Сал декабрь э вэхд ю нисе оморе, поисдени э вэхд поиз, кейки э гофгьой шогьиревоз март эдее генжире чой э апрелевоз ве гузет сохденуьт э май. Стихигьой гIэил гуйге шекуьлгьой усдо ранглуьни, рачи, шори доре гьер хундегоре. Хьэйф, у нисе нуьвуьсде э зугьун тати, зугьун дедеи, вихди эри хуьшде зугьун уруссире. Уш зобуне кор нисди, чунки зугьун урусси эри иму зугьун кес нисди, оммо зугьун суьгъде миллет хуьшдереш фурмуш сохде герек нисди, уш нисе бурав эз ер иму, эхи э и зугьун садгьо эрхэгьо шивдогьой иму гоф сохдет ве нуьвуьсдет э зугьун тати. Э стихигьой чуькле Хьизгъил гьисди фикиргьо, комики э муьвэхь келегьош кими вэхд ниев. Меселен, у нуьвуьсдени э арт эн е стих, ки «Вэхьше хьэйвугьо бие зигьуь э азади, э гъэд гъэфес угьо бегьем зигьисде нидануь». И лап лугъонде фикири. Хубе стихигьо нуьвуьсди чуькле шогьир э хотур екимуьн тербиедорегор хуьшде. Э инжо иму шиновусденим сес мерди, комики эз биней дуьл ве нешумой хуьшде гуфдирени согъбоши э метлеблуье тербиедорегор школеи хуьшде. Кем-кем у сер гирдени темай эн школа, чуьтам гIэилгьо хунденуьтге, э еки возиренуьтге, чуь дуь эз зеки дануьсденуьт, хуте биренуьт. Гирошденуьт салгьо, Хьизгъил бирени келете, мерэгъгьоюш э зевер варафденуьт. Шев-нимешев у нисе дануьсде хисире, уре воисдени э астаргьой асму денишире ве хьэйф оморе, ки у нисди гъуш, нисди уре гъэнетгьо эри пар зере рафде э дуригьой космос. Э дуьл дэгъдэгъэревоз хунденим иму стихигьоре, эже шогьир гуфдирени эз кефсуьзе дедей: «Туь товуш чумгьой мени, мебош нечогъ, воисдени стихигьо михунум эри туь, воисдени э стихигьоревоз овосуне мигуюм эри туь. Энжэгъ мебош туь нечогъ, э меш эри келе сохде туь гереки, ме э гIуьмуьр келе мерд мие расуьм». Э екимуьн книг хуьшде жовоне шогьир Хьизгъил Авшалумов-Гилядов бирмундени хубе дананигьо э литературай гIэили. У юш нуьвуьсдени тозе гофгьо, комигьоки те у э литература небу, э чуькле сесевоз гуфдири келе фикиргьо, войгегьо, хэелгьо. Имуре эз гьеммей дуьли воисдени, ки Хьизгъил келе бире-бире расуь э хубе барасигьо э литература, нуьвуьсуь э гъэдер келебебей хуьшде. P.S. И пушогьо иму вегирдейм шоре хэбер, ки ведиромори э Москов дуьимуьн книг жогьиле шогьир. Омбаракбу! Хосденим эри туь э тозе барасигьо расиреи э литуратурей чуькле хэлгъ иму.
    Фотогалерея[IMG]



Поделиться этой страницей