Хьуьрметлуье нум гьемватаниму

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    [IMG]Э торих гъэдимие шегьер иму Дербенд деруьт омбаре гIуьзетлуье одомигьо, комигьоки э тэгIрифлуьи ведебердет гIэзизе Ватан имуре. Иму э эрклуьиревоз гирденим нумгьой комсомолчигьой эн суьфдеи салгьой хьуькуьмет Советире, эшгълуье бэхшвегиргьой э гуьнжо овурдетгьо колхозгьоре, э келе жуьргIэт ве ватанхогьиревоз гъовхо бердетгьо э мейдугьой Буьзуьрге довгIой Ватани, тозеден оводу сохдетгьо вечаруьсде хозяйствогьой хэлгъире, гIилмчигьо, духдиргьо, учительгьоре ве диеш. Э жергей энугьо дебирет омбаре гIуьзетлуье ве тэгIрифлуье кукгьой хэлгъ имуш. Меселен, ижире одомигьо чуьн А.Гилядов, С.Ильдатов, С.Абрамов, С.Семенов, П. Ильягуев ве чендигьойгеш. Э товун энугьо ве диеш иму омбар нуьвуьсдейм э нуботлуье верэгъгьой гозит иму. Оммо э гIэрей хэлгъ иму деруьт омбаре одомигьо, дуьруьсде рэхь зиндегуни ве жофои комигьоки верзиренуьт эри дануьсдеи э товун энугьо биевгьо эрхэгьойму.
    Унегуьре эри ихдилот сохде э товун еки эз ужире одоми эри хундегоргьойму, и пушогьо ме рафдебируьм э хуней Беньягуев Владимир ве текелиф бисдоруьм эки эну эри суьгьбет гировундеи э меревоз ве нуьвуьсдеи еровурдигьой энуре э товун хьуьрметлуье бебей хуьшде. Беньягуев Пинхас Ихиилович эз деде хьэсуьл омори 27-муьн март э 1920-муьн сал э шегьер Дербенд э кифлет жофокеш. Э омбарегIэиллуье кифлет бебей хуьшде – Ихиил демуьрчи, Пинхас бу сеимуьн ферзенд. Ихьиил -демуьрчи, комики бу еки эз сенигIэткоре ве хьуьрметлуье одоми хэлгъ иму, бу несигIэткор, ве хуте сохдебу омбаре шегуьрдгьоре э сенигIэт демуьрчии. Бире омбар жофокеше одоми Ихиил Беньягуев хьэшд гIэил хуьшдереш тербие дори э овхьолет дусди ве жофокеши. Дедей Пинхас-Абаева Пурим э кор хьуькуьмети гьич кор не сохдигеш, омбар жофодусде одоми бири. Гьемме гIэилгьошуре угьо дорет буьлуьнде дананигьой соводи ве расундет э метлебгьой дуьл ишу.
    Пинхас Ихиилович Беньягуев хунде варасде миенее школей №I э нум Сталин э шегьер Дербенд, э I934-муьн сал дарафдени эри вегирде зиедие дананигьой соводире э ю муьхьшуьл бугьо сенигIэт гуьре э механически техникум э шегьер Махачкале. Ве э 1939-муьн сал э барасиревоз варасде техникуме э войгей хуьшдеревоз рафдени эри кор сохде э завод шишеи эн Огни, чуьн техник-монтажник.
    Э I939-муьн сал жовоне сенигIэткоре фуьрсоренуьт э солдати э Лешгер Совети эри гъэлхэнд дошдеи серхьэдгьой гIэзизе Ватан хуьшдере. Гъуллугъ солдати эну гирошдени э 4-муьн Донецки казачьи дивизие чуьн сабельщик, ве лап хубе нишоней дусди-бирори э де хэлгъгьой вилеет имуревоз, э буьзуьрге хэлгъ уруссиревоз бирмунди э дуьрусде гъуллугъи хуьшдеревоз кук догъистони, гIэзизе ферзенд хэлгъ иму Пинхас Беньягуев.
    [IMG]Оммо оморе сер гиденге, мэгIлуьмсуьзе довгIо ченд миллион одомигьой совети ерэгъэ э дес вегирде, э жун хуьшде рэхьм не берде, э игиди ве жобордиревоз женг бердуьт э фронтгьой довгIои э гъэршуй беде дуьшмен. Гьемчуьн э гIэрей энугьо дебу Пинхас Беньягуевиш – жовоне гъовхобер эз шегьер Дербенд. У довгIоре сер гирдебу э вилеет иму э шегьер Белосток. Эз 1942-муьн те 1944-муьн сал у гъовхо бердебу э 347-муьн стрелкови дивизие, чуьн стрелок-красноармеец. Э 1944-муьн сал у бири радист эн 329-муьн стрелкови дивизие ве те эхир довгIо гъовхо берди э 1015 жирелуье артиллерие, чуьн связист. Гьинорменде гъовхобер э игиди ве фегьмлуьи хуьшдеревоз дануьсдебу хуб бегьем сохде, гьер э ю тапшуьрмиш сохде оморебугьо гъуллугъире. Э вэхд гъэзоблуье довгIо П. Беньягуев се бо бирени яралуь, оммо дуьруьсд ведиреморе эри Ватан хуьшде, чуьн сегьмсуьзе жоборде кук вилеет совети бирмунди у хуьшдере э фронт э гъэршуй хунризе дуьшменгьо.
    Варасдени довгIоре Пинхас Беньягуев э 1945-муьн сал э Австрия э шегьер Вена. Эри э гьинормендиревоз гъовхо бердеи э фронт э гъэршуй талавурчигьой фашисти, Пинхас Беньягуеве доре оморени «Орден Гъирмизине Астара», «Орден Буьзуьрге довгIой Ватани» ве ченд медальгьош.
    ДовгIо варасденге, жовоне бесгъунбер вогошдени э суьгъде шегьер хуьшде, ве сер гирде оморени дуьруьсде рэхь жофои эну.
    Тигъэтлуь фегьм сохде книжкей жофои эн Пинхас Ихиилович Беньягуеве э пушойму эдее гирошде оморе гьэгъигъэте чигьретгьой зиндегуни эну. Инуьт е ченд ризгьой увэхдине рэхь жофои эну.
    Э 1947-муьн сал гъобул сохде омори чуьн рэхьбер э механически усдохоне Даггаз шегьер Дербенд. Э 1948-муьн сал дарафдени эри кор сохде э отделенией рэхь гьовуние станци шегьер Дербенд э гъуллугъи инженер-технолог. Э 1950-муьн сал е сал кор сохди механик э завод шишеи дигьбон Огни. Эз 1950-муьн те 1952-муьн сал кор сохди чуьн инженер-механик э рэхьлуье-эксплуатационии участок э шегьер Дербенд. Э 1952-муьн сал гъобул сохде омори э гъуллугъи завбюроинвентаризациеи.
    Эри диеш расиреи э буьлуьнде барасигьой жофокеши Пинхас Иихиилович Беньягуев э 1951-муьн сал дарафдени эри хунде э Ростовски инженерни-строительни институт, э факультет промышленни ве граждански вокурдеи, комиреки э 1967-муьн сал хунде бегьем сохдени, вегирде сенигIэт инженер бенновокурдегоре.
    Э 1961-мун сал у кор сохдени чуьн инженер проектни-сметни бюро эн Министерствой коммунальни сэхьиблуьгъи ДАССР. Э 1962-муьн сал уре норенуьт технадзор э Ремстройучасток. Э 1963-муьн сал кор сохдени рэхьбер филиал эн Дагмежколхозстройпроект. Эз 1964-муьн те 1969-муьн сал у кор сохдени рэхьбер эн Грозненский участок, Догъистонлуье РГТИ. Эз мегь сентябрь 1969-муьн салевоз норе оморени рэхьбер карьерни участок эн трест Меливодстрой э завод блокгьой дувори.
    Э вэхд эни салгьой корисохи эну, чуьн рэхьбер э и корхоне, гъуч сохде оморебу рэхь, комики овурдебу эки барасигьой вокурдеи ЦРБ, турбаз, вокурде оморебу рэхьгьовуние тупик, тозе рэхь ологъолуь бугьо э совхоз э нум К. Маркс. Э 1975-муьн сал П.Беньягуев кор сохдени чуьн келеи инженер эн производственни-технически десде эки райархитектура э кор серворлуье инженер. Эз 1976-муьн те 1979-муьн сал бири технадзор э совхоз «Рэхь эн Ленин». Эз 1979-муьн те 1980-муьн сал кор сохди чуьн инженер передвижной-механически колонна э Дербентски ПМК.
    Э гIэрей эни кутэхьэ ризгьо воисдегор мидануь хунде ве ошгор сохде эри хуьшде омбаре гъозиегьоре: тозе сергирдеигьой корире, асант нисдигьо рэхьэ эки барасигьой жофои, герме ве тиже бэхьсгьо ве меслэхьэтигьоре э вэхд омбаресэгIэт-луье гуьрдлемегьо, видов-видовигьо ве эрэгъ жофоире.
    Эзуш бэгъэй эри зиндегуни увэхдине, иллогьки эри жовонгьо, гъойделуь бу эшгълуье бэхшвегири э гьемме коргьой жэгIмиети. Ижире офхьолет гуьнжуьндебу келе минкинигьоре эри томом очмиш сохде божоренигьой жоборде, зарблуье корисохэ.
    Э дуьруьсдиревоз жофо кешире э жире-бе-жире корхонегьо, доре келе хьэвес ве гъувот хуьшдере э ю тапшуьрмиш сохде оморе жогьобдорлуье гъуллугъигьо, зиреки , божорени, лугъонде дананигьо ве талант энжомсохи энуре доре оморени верзирение гъимет, чуьн эз тараф хьуькуьм, гьемчуьн э гIэрей корсохгьой хуьшдеш. Э гIуьзет э номуслуьиревоз кор сохдеи э гIэрей омбаре салгьо э 1980 муьн сал Ветеран довгIои ве жофои рафдени э верзуьшлуье форигъэти хуьшде.
    Оммо эки келе хьэйфбери воисдени гуфдире, ки 13-муьн октябрь э 1983-муьн сал эз беде зэгIифи муьрдени жоборде гъовхобер ве дуьруьсде, жуьргIэтлуье жофокеш Пинхас Ихиилович Беньягуев.
    Мигуюге инжо гIэмел миомо эри бегьем сохде ихдилоте э товун Пинхас Ихилович Беньягуев. Оммо эри ме оморинигьо чигьрет эну гьелем томом кешире не омори, гуйге вес нисе сохде е-дуь ризигеш. Эз у товуне ме генеш э вэхд суьгьбет гировундеиму э Володя Беньягуевоз эдем хэбер ве зиедие пуьрсуьшгьо доре э товун кифлет эну эри варасире, чуь вес нисе сохдеге эри томом ошгор сохде чигьрет эни тэгIрифлуье мерэгълуье одомире. Гьелбет, уре дебу келе хьуьрмет неки э гIэрей корсохгьо, гьемчуьн э гIэрей хэлгъ ве кифлет хуьшдеш.
    Э 1950-муьн сал Пинхас Беньягуев хосдени эри хуьшде жовоне раче духдер дербиндире – Худатова Аида Соломоновнаре, комиреки гьемватанигьойму хуб шинохдебируьт чуьн еки эз данандее ве синогълуье медсестра-лобаранте. Эеки э зен хуьшдеревоз угьо дошде веровундет се бэхдевере гIэилгьоре ве расундет э нике метлебгьошу. Изму келеи кук энугьо – Александр, варасдегор эн Орджонекидзевски институт, факультет инженер-механическире изму зигьисдени э вилеет Исроил. Людмила – духдер энугьо, рафди рэхь дедешуре, хунде бегьем сохде медучилищере кор сохди чуьн медсестра. Изму ченд салгьо зигьисдени э Железноводск э кифлет хуьшдеревоз. Володя, ки чуьклеи ферзенд энугьо, хунде бегьем сохде факультет экономическире гье э у институт, изму кор сохдени чуьн серворлуье хьуькуьметлуье налогови инспектор э налогови гъуллугъи МРИ ФНС Уруссиет №3 э РД ве уре дери келе хьуьрмет э гIэрей могьлугъ шегьер Дербенд.
    МерэгIлуьни, ки келете эрхэгьой Беньягуевгьо омбар хьэвеслуь бире эки соводи ве гьобул сохдеи буьлуьнде дананигьоре, гьемчуьн гIэилгьой энугьош омбар мерэгълуь бирет эри ферзендгьошуреш доре буьлунде дананигьой соводи. Гьер пенж невегьой эн Беньягуевгьо: Пинхас (нум комики норе омори э гIуьзет келебебе), Давид, Зина, Вадим, Аида гъобул бирет э буьлуьнде идорегьой соводи, ве доренуьт келе тигъэт хуьшдере эки ишу эз дуьли вихде оморетгьо сенигIэтгьошу.
    Изму ченд салгьо келебебе ве бебейхолу Пинхас Ихиилович Беньягуев не деригеш э гIэрей кифлет хуьшде, оммо гIэзизе чигьрет эну гьеммише дери э дуьлгьой гIэилгьо, невегьо ве нишрегьой эну. Гьемчуьн э келе хьэеменди ве гIэсуьлменди хуьшдеревоз гъэзенмиш сохди у дусди ве хьуьрмет гьемватанигьой хуьшдере.
    Мататова Мая
    Дагестанская республиканская газета "ВАТАН" на горско-еврейском языке

Поделиться этой страницей