Жофо гьисди гIуьзет инсон

Тема в разделе 'Жугьури', создана пользователем ИРА, 16 окт 2010.

  1. ИРА Guest

    Симпатии:
    0
    Баллы:
    0
    Жофо гьисди гIуьзет инсон

    [IMG]Гъэдимие шегьер иму Дербенд гIуьзетлуь ве буьзуьрги э жофокешгьой хуьшдеревоз. Чуьжире коргьоре не веровундуьтгеш шегьеригьой иму жофой энугьо гьеммише барасилуьни. Чуьни э дуьньегь эз у кор зиедте, кейки туь дануьсдени, жофой туь одомигьоре гереки гуфдире? Омбаре хубе сенигIэткоргьо: дерзигьо. чекмечигьо, доллокгьо ве чендигьойгеш кор сохденуьт э корхонегьой шегьер, э жофой комигьоревозки веровунде оморенуьт гьемме гъуллугъигьой инсон. Э усдоети хуьшде муьгьбетлуь не бугьо сенигIэткор не лезет кор хуьшдере ни вегируь, не угьоре софой жофо ни дуь. Эвнил Абрамов э сенигIэт хуьшде муьгьбетлуь гьисдигьо одоимини, комики бэхшири гIуьмуьр хуьшдере э гъуллугъ эн вихде оморигьо сенигIэт хуьшде. Эвнил Хиврумович Абрамов хьэсуьл омори 19-муьн ноябрь э 1970-муьн сал э кифлет жофокешгьо. Бебей эн Эвнил согъ гIуьмуьр хуьшде кор сохди, чуьн доллок э еки эз меркезлуье доллокхонегьой шегьер Дербенд э куче э нум Кобякова бугьо. Гьемчуьн дедеюш Яфа жофо кешири экуьнди 20 салгьо, чуьн тербиедорегор эн богъчей гIэили. Гуфдиренуьт, ки гъэрд ферзендгьои сер гирде кор бебегьоре те эхир расунде ве бегьем сохде нике метлебгьой бебегьошуре. Гьэгъигъэте эвлод мибу хьисоб сохде энжэгъ у ферзендгьоре, комигьоки зиед сохденуьт у коре, комиреки эри бегьем сохде бебегьоре не бири минкин. Унегуьре бебе-дедей энугьо бире омбар жофодусде одомигьо, ферзендгьой хуьшдереш дошде-веровундет э овхьолет жофодусди, ве вемухундет дуь хэлеф хуьшдере, муьгьбетлуь сохдет угьоре эки сенигIэт хуьшде. Гьер 5 гIэилгьой эн Абрамовгьо зу дануьсдет гъэдуьр жофоире. Изму хэгьер-бироргьой Эвнил: Марина, Ада, Джейран, Нисон эвленмиш бирегьоют ве зигьисденуьт э кифлетгьошуревоз. Изму эз Эвнил ве Марина бэгъэй се хэгьер бирор эну зигьисденуьт э вилеет Исроил. Гьеле эз гIэилиревоз эвниле воисдебу вегирде сенигIэт бебере, унегуьре э 1985-муьн сал Эвнил бегьем сохде 8 класс хундеире рафдени э Махачкале ве дарафдени эри хунде э учебни-производственни комбинат. Бэгъдевой уре варасдеи Эвнил вогошдени э хуне ве эз у рузевоз сер гирде оморени рэхь жофои эну, дарафдени эри кор сохде э доллокхоне, эжеки эеки э бебей хуьшдеревоз бегьем сохдени везифей могьлугъ мердунере, чире сергьо, рушгьошуре ве сохде стильни прическегьо. Э 1988-муьн сал Эвнил Абрамов рафдени эри бегьем сохде гъуллугъ солдатире э Сибирь э шегьер Новокузнецк. Воисдени гуфдире, ки гьеле э вэхд хундеи э школе у омбар мерэгълуь бире эки музыке, бегьем сохдени музыкальни школере э класс аккордеон, комики кумек бирени эри жовоне лешгерчи э вэхд гъуллугъ сохдеи солдатире. Инжо уре фуьрсоренуьт э клуб, чуьн жигегир рэхьбер эн методически коргьо. Ведире зиреки ве божорени Эвнил Абрамове вихденуьт уре комсорг батальон. Э 1990-муьн сал Эвнил вогошдени эз солдати ве дарафдени эри кор сохде э Меркезлуье доллокхоне э кучей э нум Ленин бугьо шегьер Дербенд ве эеки э сенигIэткорлуье доллокгьоревоз, чуьн Мушоил, Мигьир э келе хьэвес ве жогьобдорлуьиревоз гъобул сохдебу ве веровундебу гъуллугъ муьшдеригьоре. Э вэхд гирошдеи политически ве социальни дегишигьо, Эвнил межбур бирени эри вокурдеи частни доллокхонере э хуней бебеи хуьшде. Салгьо эденбируьт дуь екире дегиш сохде, Эвнил Хиврумович эденбу синогъи хуьшдере зиед сохде. Изму э зевери бэхш кучей э нум Ленин гьисдигьо, э раче-бе-рачей «Снежинка» э 2002-муьн сал Эвнил э хуней хуьшде вокурди е чуькле салон доллокхоней мердуне, комики веровундени еки эз герекие гъуллугъигьой могьлугъэ. Э гIэрей эни салгьо э поки ве номуслуьиревоз кор сохде э и салон мердуне, у гъэзенж сохди хьуьрмет э гIэрей гьемватанигьой хуьшде. Гьемчуьн дери уре хьуьрмет э гIэрей кифлет хуьшдеш. Эеки э Виолета зен хуьшдеревоз угьо эдее дошденуьт ве тербие доренуьт 3 гIэилгьоре: Ронель, Света, Натане. Изму Ронель гьисди студент эн суьфдеи курс школей искусств, шегьер Дербенд, варасде комиреки у мидануь бире программист. Оммо уре гьисди гьемчуьн метлеб рафде рэхь бебе-келебебешуре, бире хубедоллок-сенигIэткор. Света ве Натан гьелем хунденуьт э школе ве шор сохденуьт дуьл бебе-дедешуре э гъобул сохде дананигьой хундеишуревоз. Расде гуфдиренуьт, ки жофо буьзуьрг сохде одомире, шори ве хьэвес доре инсоне. Э усдоети хуьшде муьгьбетлуь гьисдигьо Эвнил Абрамов эдее вегирде софой жофой хуьшдере эз кор, чуьнки мэгIэной зиндегуни эну э жофо дери. Э эхир эни статья воисдени хосде эри Эвнил Абрамов жунсогъи, ники гIэилгьой хуьшдере виниреи, э гьемме метлебгьой дьул хуьшде расирени.

Поделиться этой страницей